Fundacion Pa Nos Muchanan tabata tin un exitoso programa di 'Stima Mi Guia Mi'

ORANJESTAD (AAN):  Durante henter luna di Juni, Fundacion Pa Nos Muchanan (FPNM) a ofrece un biaha mas e programa di Stima bo yiu,

Guia bo yiu (Stima Mi, Guia Mi). E programa a enfoca riba mayornan cu yiu entre 2.5 aña – 4 aña. 13 mayor a participa hunto cu nan yiunan, cual 8 ta mama y 5 ta tata.

            Stima Mi, Guia Mi ta un programa cu a wordo inicia door di Kiwanis Club of Palm Beach y cu a wordo traspasa oficialmente na FPNM riba 23 di Augustus 2022. Desde e traspaso oficial, FPNM a sigui organisa varios sesion pa mayornan y nan yiunan.

            E programa cu a finalisa riba 29 di Juni 2023, a consisti di 6 sesion unda nan a ricibi diferente charla di parti Fundacion Pa Nos Muchanan, Fundacion Respetami, Centro pa Hoben y Famia, y Tienda di Educacion.

            E mayornan a participa hunto cu nan yiu, na unda nan a toca e siguiente temanan: E importancia di e prome añanan, Introduccion di Mayor Sensitivo y Responsivo, E relacion entre mayor y yiu, E importancia di Desaroyo Social-Emocional, Limite y Disciplina Sensitivo y Responsivo, y Hungamento pa stimula e areanan di desaroyo.

            E encuentronan tawata yena cu informacion y tambe actividadnan interactivo. E muchanan tawata pasa un rato dibertido hungando cu otro bou guia di dos trahador pedagogico, mientras e mayornan tawata tin e oportunidad di ricibi informacion y comparti nan experiencia cu otro. Tambe Despues di esaki a sigui e momento pa e mayornan pone locual nan siña den practica cu nan yiu.

            Kier a felicita tur e participantenan y alabes gradici Kiwanis Club of Palm Beach, Tienda di Educacion, Fundacion Respeta Mi, Stichting Wit Gele Kruis y Centro pa Hoben y Famia pa nan sosten durante e ultimo simannan. Mayornan di muchanan entre 0 pa 4 aña pa keda pendiente pa e siguiente tanda di Stima Mi Guia Mi.