Fundacion pa Nos Comunidad hopi contento cu nan evento pa empaketa cuminda a bira un exito rotundo

Gianaika van der Biezen a splica:

ORANJESTAD (AAN)—Gianaika van der Biezen di Fundacion pa Nos Comunidad (FPNC), den un entrevista cu DIARIO a mustra su satisfaccion pasobra e evento cu nan a organiza di empaketa cuminda pa personanan den necesidad tabata un exito rotundo.

El a duna di conoce cu tur e companianan cu a participa a keda sumamente contento, y reaccionnan cu el a haya ta sumamente positivo, y nan a indica caba cu otro aña nan kier participa.

E evento aki tabata tin e meta pa comunidad, companianan y companianan participa como team building pa empaketa cuminda pa e Fundacion, y tambe e aspecto di duna bek na comunidad. Y asina entrega e pakete na e clientenan. Gianaika a menciona cu tur luna e fundacion tin entre 300 pa 350 famia cu nan ta yuda, y esaki sigur lo yuda haci e pakete mas grandi, cu por asegura cuminda cayente, tin e parti di desayuno y cuminda merdia.

Esaki ta e di cuater aña consecutivo cu e evento aki ta tumando lugar. Esaki ta pa yuda e Fundacion agrega na e pakete. Naturalmente mester di mas comestible pa engrandece e pakete pa un luna. Fundacion pa Nos Comunidad ta un NGO y e subsidio cu nan ta haya ta hopi tiki y e ta yega pa nuebe pakete pa luna, pero nos tin cu entrega tur luna entre 300 cu 350 pakete na cas di famia, Gianaika van der Biezen a menciona. El a agrega cu mas chikito e pakete ta menos e ta yega pa full un luna, pero e fundacion semper ta busca donacionnan pa yuda engrandece e pakete.

E ta expresa un danki special na Marriott Hotel cu a habri porta dos biaha pa e fundacion por a haci e evento aki posible; nan a zorg pa e localidad, refreshment, cuminda y bebida, y pasobra semper nan ta colabora cu diferente proyecto.