ORANJESTAD (AAN): Fundacion Lanta Papiamento (FLP) ta expresa su gran satisfaccion cu e exitoso anochi di lansamento di e buki ‘Ata Compa Nanzi atrobe!’,
cu a tuma luga recientemente na Biblioteca Nacional Aruba. E evento a reuni un publico entusiasta cu a disfruta plenamente di tur presentacion y detaye relaciona cu e buki, cu ta presenta e storianan di Compa Nanzi den un version nobo, fresco y innovativo.
E obra literario ‘Ata Compa Nanzi atrobe!’ ta basa riba storianan original di Yvette Ecury y Andy Daal, cu ta forma parti importante di e tradicion di contamento di historia di Compa Nanzi, un figura iconico den cultura Caribe y den literatura na Papiamento.
Durante e anochi literario, publico a por disfruta di un programa varia cu presentacionnan cultural, contamento di historia y informacion tocante e proceso creativo di e buki. E atmosfera ameno y participacion activo di e asistentenan a haci di e evento un celebracion digno di nos idioma y herencia cultural.
Fundacion Lanta Papiamento ta gradici sinceramente tur persona y instancia cu a contribui na haci e lansamento aki posibel. Entre esnan cu a brinda apoyo y colaboracion tin UNOCA Aruba, Cultuurfonds Caribisch Gebied, Coleccion Aruba, Biblioteca Nacional Aruba y Archivo Nacional Aruba.
Cu e lansamento di ‘Ata Compa Nanzi atrobe!’, Fundacion Lanta Papiamento ta continua su mision di promove, fortalece y celebra uzo di nos idioma Papiamento, mientras cu e ta mantene bibo nos tradicion di contamento di historia pa generacion actual y futuro.
