E fundacion ta focus riba mucha y hobennan di Aruba
ORANJESTAD (AAN): Den un encuentro ameno e mandatario di enseñansa a reuni cu Edselyn Figaroa y Liza Helder di Fundacion Instituto di Desaroyo di Arte y Cultura (FIDAC).
E fundacion ta focus riba mucha y hobennan di Aruba. Pa yudanan crece den nan talento y creatividad pero semper cu nos cultura y tradicionnan central. Durante e reunion a presenta Minister Endy Croes di un proyecto nobo pa mucha titula ‘Mi mes un heroe’.
E ta proyecto di prevencion di abuso di mucha entre 0 – 12 aña y ta consisti di entre otro un buki, programa na television, cantica, pintamento y diferente actividad.
Meta di e proyecto ta pe muchanan conoce nan derecho, reconoce e ‘red flags’ nan di abuso y pa no tin miedo di papia. Tambe ta importante pe docentenan, mayornan y comunidad conoce e storia di buki p’ asina nan por compronde e muchanan miho.
Finalisando e mandatario ta felicita Edselyn Figaroa cu e bunita proyecto aki. Minister Endy Croes y Gobierno di Aruba ta sostene e proyecto aki.
