Esun mas largo encarcela den Reino Hulandes
PHILIPSBURG: Desde aña 1984 e asesino burdugo Ashton Lake ta encarcela. El a comete un crimen horible door di viola e mucha muher Amy Velasquez di 5 aña net riba dia di cumpleaño di e criatura! Despues di a comete e abuso sexual, el a mata e mucha door di tire den lama, cu un baranca mara na su pianan. E tabata kier a tuma venganza riba e famia.
E caso ey a sacudi tur hende na isla di St. Maarten, y na Aruba tambe DIARIO a duna relato extenso di e caso ey. Bon mes cu e tempo aya na St. Maarten, autoridadnan a traha rapido riba e caso y a detene e asesino Ashton Lake. Ora cu habitantenan di St. Maarten a haya sa cu Polis a gara e asesino, un multitud grandi a acudi na Warda di Polis y na forma furioso kier a drenta pa asina tuma husticia den nan mesun man, y regla cuenta y tuma venganza riba Ashton Lake.
Ainda por corda con e mama di Amy a skirbi un carta pa Reina Beatrix unda el a boga pa Husticia duna e castigo maximo pa e burdugo. Reina Beatrix a hasta skirbi un carta y contesta e mama.
E asesino Ashton Lake ta di nacionalidad Britanico procedente di e isla di Anguilla. Na 1984 el a wordo sentencia na bida largo, y awor na 2022 e ta oficialmente e persona cu tin mas hopi tempo encarcela den henter Reino Hulandes. E tin 38 aña caba ta hiba un bida encarcela den prison. Pa su mesun seguridad, el a wordo hiba Curaçao unda e ta pasando hopi aña caba encarcela.
Aworaki ya Ashton Lake tin 59 aña di edad, y el a presenta dilanti Huez den Sala di Corte na Curacao, cu tabata casi full bashi. Na final di e sesion, Huez a dicidi cu dia 1 di Juli 2022 e lo wordo laga bek den libertad. Pero e lo wordo deporta mesora for di Curacao bek pa su isla natal cu ta Anguilla. Huez a bise cu e motibo pakico na 1984 a dune castigo di bida largo, ta pa evita cu e ta bira recidivista. Pues e tempo ey e chens cu e lo a comete un crimen similar tabata wordo considera hopi halto. Pesey sociedad mester a haya proteccion for di dje. E bida di henter e famia di Amy a wordo destrui pa loke Ashton Lake a haci.
Ora cu el a haya chens di papia, Ashton Lake a bisa: “Mi sa cu nunca boso lo por bay pordonami, pero mi kier bisa boso cu mi ta lamenta loke mi a haci.” Ta parce cu di berdad el a compronde e consecuencianan di su accion, y esaki a wordo confirma pa su sicologo y otro expertonan.
Tempo cu Ashton a comete e crimen, e tabatin 21 aña di edad. E tabata un piscado y tabatin masha poco educacion. Durante su 38 aña encarcela, el a tuma numeroso curso, el a mehora su dominio linguistico, y a desaroya habilidad di traha riba computer. Den prison na Curacao el a siña tambe bira carpinte y con pa fura stul y matras. Presonan ta gana menos di $1 pa ora, di cual mitar ta bay den un cuenta di spaar. Segun abogado di Ashton, su cliente a traha asina hopi ora den añanan cu a pasa, cu su cuenta di spaar ta suficiente grandi pa e por biba algun luna despues cu e wordo libera di prison.
