Minister Rocco Tjon ta splica:
ORANJESTAD (AAN) – Den e conferencia di prensa yama pa Minister di Husticia y Asunto Social, Rocco Tjon, el a menciona cu Fundacion Imelda Hof tin un debe cu Pais Aruba, di mas di cuater miyon florin, pero di otro banda tambe nos a wordo confronta cu un rapport, cu ta toca e clima di bida di e muchanan cu ta ubica akinan.
E mandatario a sigui splica cu basa riba esaki el a hiba un combersacion cu e directiva saliente, y a splica nan cu e situacion no por sigui asina. E ta kere cu e motibonan ta obvio ora el a menciona e puntonan ey.
Pa loke ta trata e seguridad di e muchanan, nan clima di bida, e mandatario a expresa cu e conclusionnan ta asina alarmante, cu hasta nan a hiba combersacionnan cu Ministerio Publico, den e caso aki, cu Procurador General.
“Mirando tur e aspectonan aki mi ta kere cu ta obvio e seriedad di e situacion. Y un bez cu bo ta wak e parti financiero y bo wak e parti aki, obviamente nos a wak cu e statutonan di e Fundacion aki ta data di aña 1976. Mi ta kere cu ora di papia di ‘Good Corporate Governance’ e statutonan mester ta up to date y no cu ta data di añanan 70 mas”, e minister a agrega.
E dignatario kier a aclarea tambe tocante metemento politico. El a reitera cu el a bisa na inicio cu Fundacion Imeldahof ta un organizacion completamente independiente. “Y a base di e combersacion cu nos a hiba cu nan, como un mandatario responsable pa trece e mehoracion tambe, nos a bisa nan cu e situacion no por sigui asina, y nan boluntariamente, a dicidi tambe entrega nan retiro. Nos como gobierno, no por exigi esaki, sinembargo nan a compronde e situacion, y nan a entrega nan retiro”, Minister Rocco Tjon a remarca.
El a indica tambe cu den un carta cu su ministerio a dirigi na e directiva bieu, ta bisa claramente pa nan no nombra un directiva nobo, pero pa nan laga esaki pa Corte, pasobra segun ley y segun Statuto, Corte ta e caminda indica cu nan por nombra un directiva nobo. “E directiva saliente a contesta nos, y a haci e peticion na nos pa percura pa haci un traspaso lihe, pa por atende tur e retonan y pa Ministerio mes, nombra un directiva. Nos a haci esaki, y nos ta papia di un directiva temporal riba peticion di e directiva saliente”, e dignatario a duna di conoce.
Pa conclui el a reitera cu Stichting Imeldahof ta un organizacion completamente independiente, a scoge temporalmente un directiva nobo, cual miembronan cu a wordo apunta ta profesionalnan cu hopi experiencia den e parti di liderazgo, Good Corporate Governance, e aspecto huridico, y e aspecto financiero, y hopi importante tambe un profesional cu tin hopi experiencia riba e parti social y di guia pa e muchanan aki. Kiermen, e ta compronde e trabao “inhoudelijk”.
