SANTO DOMINGO: E aerolinea jetBlue a lamenta y a pidi disculpa pa e inconveniencianan cu nan a hinca pasaheronan aden,
y a trata na bin cu un storia y excusa pakico a cancela algun vuelo, sin cu a duna ningun clase di splicacion na e pasaheronan. Nan a bisa awor cu tabata haci trabao di mantenimento riba e avionnan, y awor nan ta riba un plan di accion pa evita cu cualkier situacion similar bolbe socede den futuro pa nan clientenan na Republica Dominicana.
E aerolinea Mericano a bisa cu e prioridad di nan ta sigui di ta pa hiba un operacion sigur, y pa ofrece un experiencia di viahe positivo na nan clientenan di Republica Dominicana.
“Nos ta reitera cu Republica Dominicana ta un mercado di prioridad pa jetBlue y nos ta sigui bin cu plannan pa mitiga cualkier inconveniente pa nos clientenan dominicano,” ta loke e aerolinea a indica den un boletin.
Nan a bisa cu nan ta compronde e preocupacion y comentario di clientenan, y a bisa cu tanto jetBlue como tambe henter e industria di turismo a pasa den algun aña inusual, y cu e verano aki nan a haya un record cantidad di pasahero, siendo cu ainda nan ta trata di sobrepasa algun reto di operacion.
“Nos ta lamenta profundamente y ta pidi un sincero disculpa pa e inconveniencia causa pa nos cancelacion debi na mantenimento di e avion, y cu e seguridad di nos clientenan ta nos prioridad,” jetBlue a indica.
Segun e aerolinea, e compania a wordo lanta cu e principio di ta un organizacion enfoca na e fliente y ta sigui di tin esey como un di e metanan y di nan balor principal. Nan a agrega cu jetBlue ta sigui tuma medida pa mehora e operacion, y traha pa e trato di miembronan di tripulacion ta bira mihor, y trece bek e experiencia di viahe cu tur hende conoce di jetBlue.
Excusanan duna: Segun jetBlue, riba Diasabra 23 di Juli, e vuelo 1938 di nan cu mester bula di Santo Domingo pa San Juan (Puerto Rico) a retraza dos ora debi na e retrazo pa e avion yega, y falta di disponibilidad di Gate na Aeropuerto Internacional de Las Americas na Santo Domingo. Nan a indica cu e vuelo a sali sin problema, y a yega San Juan pa 6:01 pm.
Riba Diadomingo 24 di Juli, vuelo 537 di San Juan pa Santo Domingo a wordo cancela debi na mantenimento di e avion. Nan ta bisa cu nan a notifica tur e pasaheronan ey dos ora prome, tanto via email y telefon cu e vuelo a wordo cancela. Tur pasahero a wordo poni riba otro vuelo di jetBlue den dianan cu a sigui, of a ofrece opcion pa bula pa Punta Cana, y a duna nan vouchers pa transporte of hospedahe na hotel cerca di San Juan.
jetBlue no a duna ningun comentario riba tur e otro 100 pico reclamo cu a drenta hopi mas prome cu e dos sucedidonan aki di fin di siman.
Manera ta conoci, Ombudsman di Republica Dominicano, e Asociacion di Consumidornan Dominicano, y hasta e President di Camara di Diputado a haci suplica na Aviacion Civil IDAC pa nan revisa tur e reclamonan aki, y suspende licencia di jetBlue pa bula pa Republica Dominicana.
