Ted Hazam, director:
ORANJESTAD (AAN) — Den cuadro di Dia Internacional di Hende Homber, DIARIO a entrevista señor Ted Hazam, director di Fundacion Pa Hende Homber, ken a comenta cu nan ta brinda ayudo na hopi hende muher cu ta bin cerca nan, pasobra ora hende homber ta bin na e fundacion, hende muhe ta bin nan tras.
E hende muher ta bisa cu loke e fundacion ta haci pa hende homber, esey e kier p’e tambe, y esey ta e problema cu e fundacion tin, segun Hazam a bisa.
El a splica cu estancia tin masha poco. “Nos tin algun cooperacion, pero e deficit di esaki ta keda aumenta dia pa dia. No tin algo solido; di gobierno no papia mes! Pasobra nos no por haci mucho cos, ya cu nos man ta mara. Awendia, tur cos ta placa, y sin placa bo no por haci nada”, Hazam a señala.
El a agrega cu e problemanan cu hende homber ta enfrenta a bira hopi mas grandi cu antes. E casonan a aumenta masha. “Mi sa cu e pandemia a haci un wega; pero, shonnan no ban den esey (...). Famia a degrada. Nos ta tratando di tin nan den un caminda solido. Famianan cu ta kibra nos ta restaura nan; nos tin e metodo si nan yega nan tin ayudo, pero nan mester bini. Yama nos, nos ta combersa cu bo, djey nos ta yamabo aden y ora ey nos ta sinta”, Hazam a bisa.
