Ghislaine Koeiman ta informa:
ORANJESTAD (AAN)- Den entrevista cu Ghislaine Koeiman, Trahado Social di Fundacion Famia Planea Aruba, el a duna di conoce cu nan ta preparando nan campaña di informacion y concientizacion “Ami ta dicidi 2024”, pensando principalmente pa e temporada di carnaval.
Koeiman a menciona cu Fundacion Famia Planea ta bay enfoca mas riba e hobennan, pasobra e sa cu hopi ta pensa cu nan ta bay sali mas riba caya, cu nan ta bay tin nan relacion, etc.
“E ora ey nos ta bay bin cu e campaña, manera ta custumber di Famia Planea, na un manera interactivo, hopi cerca di e hobennan pa asina trece e mensahe, e concientizacion, sa na unda nan tin cu bay pa haya informacion, e importancia di proteha bo mes, no permiti pa ni un hende influencia bo”, Ghislaine a subraya.
El a indica cu hopi biaha e fundacion ta scucha hobennan ta bisa cu nan a wordo influencia y forza y e no kier a bisa no.
Famia Planea ta cuminza pa duna e hoben e informacion corecto y papia. No yega impone riba e hobennan kico nan tin cu haci. Nan ta bay den combersacion cu e hoben, biba den nan mundo, pa nan ta conciente y pensa un rato riba e decision cu nan kier tuma.
Puntra e hoben si ta cla pa haci tal y wanta su consecuencianan. Si nan ta bisa cu no, e ora ey nan ta invita e hoben pa pasa na Famia Planea y nan ta brinde e guia y e informacion pa asina evita e consecuencia pa cual e hoben no ta prepara p’e.
Tambe ta mustra e hoben e consecuencia di no proteha, kiermen, uza preservativo. Famia Planea ta mustra nan cu tin diferente tipo di preservativo, y cu no tin excuus pa keda sin us’e, principalmente den 2023-2024.
Ghislaine a comenta cu e edad mas jong cu a wordo acerca na Famia Planea ta un mucha di 12 aña, pero mester tene cuenta cu no tur hende cu ta yega na Famia Planea, ta esnan sexualmente activo caba.
“Tin productonan anticonceptivo cu ta wordo uza pa mehora e menstruacion, y nos conoce hobennan cu ta haci uso di esey precisamente. Hobennan ta drenta akinan pa busca informacion tambe, pero cu si kier prepara por si acaso algo bay pasa e ta proteha. Hopi importante ta cu nos ta papia cu hoben, pero tambe cu adulto” Ghislaine Koeiman a relata.
