Fundacion Epilepsy Aruba a bishita Traimerdia na Colegio Conrado Coronel

Pa crea conscientisacion riba epilepsia

ORANJESTAD (AAN): Fundacion Epilepsy Aruba a bishita recientemente e traimerdia na Colegio Conrado Coronel cu meta di brinda mas informacion y conscientisacion riba epilepsia, cu enfoke special riba con personal escolar por reconoce señalnan y actua corectamente ora un mucha ta experencia un convulsion durante oranan di scol of na un traimerdia.

   Durante e presentacion, representantenan di e Fundacion a comparti informacion tocante e diferente formanan cu epilepsia por presenta den muchanan. No tur convulsion ta manera cu hende ta mira riba television. Tin biaha nan por ta subtil, manera: (*) “Staring spells” (mira den nada sin respondi). (*) Confusion repentino. (*) Movimentonan chikito involuntario. (*) Perdida di atencion. (*)         Cansancio extremo despues di un episodio.

   Epilepsia ta un condicion neurologico unda actividad electrico den celebro no ta funciona normal, lo cual por resulta den convulsionnan. Pa hopi famianan, e proceso di reconose y haya un diagnostico no ta facil.

   Maestronan y personal escolar ta desempeña un papel fundamental, pasobra nan ta pasa gran parti di e dia cu muchanan y hopi biaha ta e prome persona cu nota patronnan diferente.

   Durante e sesion, Fundacion Epilepsy Aruba a enfatisa cu e reaccion corecto durante un convulsion ta crucial: (*) Mantene calmo. (*) Nota e tempo cu e convulsion ta dura. (*) Proteha cabes di e mucha. (*) No restringui su movimiento. (*) No pone nada den su boca. (*) Laga e mucha descansa y recupera despues.

   E charla tabata enfoca riba comprension, comunicacion cu mayor y reduccion di estigma. Ora personal escolar ta informa, muchanan cu epilepsia ta sinti nan mes mas sigur y sostení.

   E bishita aki ta forma parti di e iniciativa 2026 di e Fundacion bou di e tema internacional: “Turn Stories Into Action”. Cu comparti historiannan real y informacion practico, Fundacion Epilepsy Aruba ta busca converti experiencia personal den accion concreto pa crea un comunidad mas consciente y preparada.

   Fundacion Epilepsy Aruba ta continua su mision pa educa, informa y fortalece nos comunidad, promoviendo un ambiente unda tur mucha (cu of sin epilepsia) por siña y crece cu dignidad, seguridad y comprension.