ORANJESTAD (AAN): Riba 17 di december 2024, a wordo funda oficialmente e Federacion “Dutch Caribbean Mental Health”.
E federacion aki ta e resultado di un cooperacion unico entre FSMA Respaldo (Aruba), GGZ Corsou, Verslavingskliniek Brasami (Corsou), PSI Skuchami (Corsou), y Mental Health Caribbean (Bonaire, Sint Eustatius, y Saba). Mental Health Foundation (Sint Maarten) a indica cu nan lo uni mas despues na e colaboracion aki.
E meta principal di e Federacion “Dutch Caribbean Mental Health” ta pa promove un cuido di salud mental di calidad halto y accesibel pa tur e islanan den e parti di Caribe di Reino Hulandes. Door di uni forsa, e organisacionnan cu ta participando ta crea un plataforma solido pa colaboracion, innovacion y desaroyo sostenible. E esfuerso combina aki ta yuda pa mehora e cuido den futuro, cu un impacto positivo riba e cliente, profesionalnan den cuido y comunidad den e region.
E federacion ta enfoca riba, subi e calidad y desaroyo continuo di cuido. Ademas lo comparti e conocemento y experiencia organisacional. E federacion tambe ta comprometi pa fortalece e politica y leynan cu ta ahusta na e necesidadnan unico di e region, e profesionalismo di e personal di cuido pa medio di duna training y curso, manera e curso di GZ-Psycholoog pa e area di Caribe.
