Azriah Palm di Fundacion CVA Aruba:
ORANJESTAD (AAN): Fundacion CVA Aruba, e fundacion di Atake Cerebral (Stroke), ta celebrando 20 aña di existencia. Diasabra awo, dia 1 di November, lo culmina e celebracionnan cu un ‘Stroke Conference’. Den un entrevista recien cu DIARIO, Señor Azriah Palm di Fundacion CVA Aruba, ta splica cu e meta di Fundacion CVA Aruba ta pa educa y informa comunidad tocante atake cerebral y con pa preveni esaki. Señor de Palm a remarca cu ora cu un persona preveni, e ta percura pa famianan no ta pasa den tristesa y dolor y tambe ta yuda baha gastonan di AZV.
El a agrega cu e cifranan di 2023-2024, tin un fluctuacion cu ta varia entre hende homber y hende muhe den categoria di 50 aña bay ariba cu ta caminda cu mas tanto casonan di atake cerebral ta tuma luga. Segun de Palm, e hende homber ta lidera riba hende muhe na Aruba aunke cu mundialmente, atake cerebral ta e causa principal di morto cerca hende muhe door di e cambionan hormonal. Señor de Palm ta encurasha comunidad pa tene cuenta cu sintomanan bon pa asina ataca atake cerebral na tempo pa evita resultadonan devastador cu esaki por trece.
E conferencia lo tuma luga Diasabra 1 di November na Teresita Center na San Nicolas for di 9'or am te cu 4’or pm. Interesadonan cu ta desea di participa por tuma contacto cu Fundacion CVA Aruba pa mas informacion.
