LeAnn Tromp di The STEM Embassy:
ORANJESTAD (AAN): Di 29 di october te cu 1 di november 2025, studiantenan di mas di 190 pais lo reuni na Panama pa un hub mundial cu ta uni hobennan rond mundo. E evento ta un oportunidad pa e studiantenan traha hunto riba retonan global importante pa un planeta saludable, usando ciencia y tecnologia (STEM).
LeAnn Tromp di The STEM Embassy, den un entrevista cu DIARIO a conta di e participacion di Aruba den e competencia internacional di robotica aki. Esaki ta e di tres aña cu Aruba ta participa. Hunto cu un ekipo di mentor, e studiantenan Oriana Paneflek, Guiyan de Nobrega, y Ruarth Lampe, a biaha pa Panama pa e ‘FIRST Global Challenge (FGC) 2025’. LeAnn a splica cu e studiantenan a construi nan mesun robot pa e competencia grandi aki. E studiantenan aki a gana e Hackathon na Aruba cu a tuma luga na april ultimo.
LeAnn a splica cu mas y mas hoben ta desea di participa den e competencianan aki na Aruba. The STEM Embassy ta keda desaroya diferente evento pa yuda docente y alumnonan y haci competencianan pa studiantenan logra participa na e siguiente First Global Challenge.
