ORANJESTAD (AAN): E ta algo bale la pena pa bo siña haci, pasobra e momento aki unda cu ta notando cu tin hopi caso di Diabetes
y tambe malesanan Cardiovascular na Aruba, ta mihor pa siña come na un forma mas saludable.
Fundacion CVA Aruba ta organizando algo asina riba Diasabra venidero. Esey ta loke Azriah Palm di e organizacion a splica na DIARIO.
Diasabra 12 di Maart 2022 for di 9:00 am te cu 12:00 pm, lo bay tin un Charla como tambe presentacion, con pa traha cuminda cu ta yudabo preveni di haya malesanan manera Diabetes of malesanan Cardiovascular.
Palm a indica cu esnan cu acudi na esaki lo bay siña con pa traha cuminda y snacks saludable, y cu alavez ta hopi economico. E meta ta pa yuda preveni e malesanan aki.
“Nos kier keda pone cosnan bunita pa asina comunidad por siña con pa atende nan mesun salud,” Azriah Palm a splica. E ta mustra cu preparacion di cuminda y ki tipo di cuminda ta esencial pa bo cuido.
Cantidad di casonan di obesidad ta halto, y esaki a bin debi na desaroyonan di tur e añanan cu a pasa. Y tur hende por mira ta cuanto negoshi di bende cuminda a habri ultimo temponan.
“Cada ken tin derecho di cumpra nan cuminda, pero e parti di prevencion mes pa hopi aña tabata wordo suprimi, y awor nos ta mira e resultado,” Palm a bisa.
El a bisa cu e crisis di pandemia a habri “hopi postema” na Aruba, unda pa hopi aña gobernantenan tabata neglisha e problema aki y ta djis aplica un solucion superficial. Pero awor cu e problema a explota, no tin ningun solucion chikito mas pe. Awor ta tur hende tin di pone man hunto pa asina traha duro riba e parti di prevencion cu ta bay rekeri placa, y cuminza mira con por reduci e trend di malesanan Cardiovascular
Kizas no por stop tur caso di malesa Cardiovascular, pero toch por purba na baha e trend, pa asina Aruba por tin un sistema di cuido manehable.
Segun Azriah Palm, ta ideal pa adultonan acudi na e charla aki pa siña con pa traha cuminda saludable, pero lo ta fabuloso si acaso muchanan tambe bin cu nan mayornan. Pasobra bo ta engrandece e ‘contacto’ entre mucha y mayor ora cu hunto nan ta siña di e beneficionan di come saludable. E ‘bonding’ aki lo ta drecha e ambiente na cas, y e ora mayor y yiu ta siña traha cuminda of pasaboca saludable tambe.
E charla “Preveni cu Cuminda” lo ta gratis, y lo tuma lugar na Centro di Bario Brazil. Lugarnan pa e charla aki ta limita, y bo tin di registra di antemano. Haci esaki na:
www.bit.ly/cushina_salud
E charla lo bay ta den diferente grupo, unda cu e participantenan lo ta activamente ta traha cuminda, y bin cu nan mesun creatividad. Lo bay tin algun wega tambe pa mantene e charla hopi divertido.
Na final lo haci evaluacion cu ‘tasting’, y duna instruccion kico mas nan por haci na cas. Pues pa bo siña traha algo, y haya sa pakico esey ta wordo haci.
