ORANJESTAD (AAN): Pa CINEARUBA su obra auditivo e fundacion ta ofreciendo diferente tayer gratis.
E proyecto ‘TracingRED’ ta consisti di tayernan pa scribi script, traha musica y actuacion di bos incluiendo efecto di zonido.
Esaki ta bay ta e dos biaha cu CINEARUBA lo crea un obra auditivo, e ultimo tabata ‘Drama den Aire’ unda cu coriente a bay net momento cu dos amiga tabata mirando e capitulo final di nan telenovela favorito.
E obra auditivo di e aña aki lo tin e topico di sclavidtud y e storia lo wordo crea durante e tayernan. Tur tayernan ta conecta cu e obra, unda participantenan di musica lo traha e canticanan cu lo sali den e obra. Participantenan di actuacion di bos lo actua den e obra y otronan lo realisa e efectonan di zonido.
E prome dos tayernan ta di skirbi script y musica. E tayernan lo inicia dia 2 di september y tin un duracion di 12 dia parti den un luna. Tayernan lo ta tur atardi. Participantenan di script lo siña con pa tecnicamente skirbi un script, pero tambe e parti literario di un script. Participantenan di musica lo wordo introduci na instrumentonan afro-caribense y conhuto cu e instructornan lo traha e cantica pa e obra.
Na october lo inicia e tayernan di actuacion di bos cu lo bay hunto cu efectonan di zonido. Participantenan lo siña diferente aspecto di uzo di bos pa un obra auditivo y tambe con pa crea efectonan practico y digital. Di biaha lo sigui pa e presentacion final cu lo ta na november.
Tur participante lo forma parti di un podcast unda cu nan lo papia di nan expericia cu e tema, e tayernan y e proyecto. Tambe un video reportahe lo wordo haci di e participantenan unda lo documenta ful e proceso. Edad pa participa na e tayernan y e proyecto ta 12 aña bay ariba. Pa mas informacion y inscribi bishita e pagina web cinearuba.com.
{gallery}Fundacion CINEARUBA cu tayernan gratis di skirbi script, traha musica y actuacion di bos{/gallery}
