Fundacion Balorando Polis Pensionado a duna un reconocemento special na ex-coleganan

ORANJESTAD (AAN): Recientemente Fundacion Balorando Polis Pensionado a duna un reconocemento special na ex-coleganan.  

Emiliano Baarh, presidente Fundacion Balorando Polis Pensionado a splica cu e motibo cu nan a lanta e fundacion tabata, como cu e mes ta un polis, e ta reconoce e sacrificionan cu coleganan pensionado a haci, y mester duna nan balor bon mereci y por sinti e aprecio cu hende ta sinti pa nan.

Baarh a splica cu esaki ta e prome fundacion dedica na polisnan cu a baha cu pensioen. Esaki ta di dos evento cu nan ta organisa, y e biaha aki nan a dicidi di haci algo special pa nan ex-coleganan.

El a indica cu ta hopi facil pa reconoce un polis pa nan uniform, pero den caso di coleganan pensionado, ya nan no ta bisti uniform mas y pa motibo aki, a dicidi di traha un pin cu ta contene e escudo policial. E ta hopi gradici na Altocomisario Ramon Arnhem pa permiti pa nan usa escudo di polis y a pone 'Polis Pensionado Aruba'. Esaki ta nifica cu den tur actividad, nan por wordo reconoci, specialmente door di coleganan hoben cu no sa cu e grupo aki ta esun cu a habri caminda pa nan.