Fundacion Autismo Aruba ta organisa Tayer pa Educadornan

Carolina Thiel-Span

ORANJESTAD (AAN): Presidente di di Fundacion Autismo Aruba, Carolina Thiel-Span den un entrevista recien, a elabora riba e Tayer pa Educadornan cu e fundacion ta organisando dia 20 di september proximo. 

E aña aki, a base di e interes den esnan cu ta den educacion, hunto cu Comision Nacional di Autismo, a dicidi di organisa e tayer aki na unda lo brinda informacion basico di kico autismo ta y e hermentnan practico con pa maneha y yuda muchanan cu autismo den educacion. 

Señora Thiel-Span a remarca cu mas y mas mayornan ta compartiendo diagnostico di nan yiu na skol aunke hopi ta den negacion. Educadornan ta mas pendiente di muchanan cu tin trastorno pa wak kico por haci cu ne. Cu e tayer cu Fundacion Autismo Aruba ta oraganisa, por tin un maneho mas structura den educacion pa loke ta trata muchanan cu autismo of otro trastorno. 

E tayer ta gratis pa educadornan y lo tuma luga diasbra 20 di september 2025 na Marriott Resort & Stellaris Casino cuminsando for di 10:00 AM pa 4:00 PM.

Topiconan lo ta; Kico ta autismo y con e ta afecta educacion; Miho comunicacion entre scol, dunado di cuido y famia; Acomodacion rasonabel den educacion; Herment practico pa educadornan. 

Fundacion Autismo Aruba ta haci un yamada na tur educador pa asisti pa asina por pone e informacion y hermentnan cu lo wordo brinda den practica na scolnan.