President Carolina Thiel-Span di F.A.A.
*Pa check ki innovacion tin den e mundo di autismo
ORANJESTAD (AAN)-- Señora Carolina Thiel Span, Presidente di Fundacion Autismo Aruba (FAA), den entrevista cu DIARIO a comparti informacion, tocante nan biahe na Miami, unda a participa den e Conferencia “Evidence to Action: System-Driven Results”, cu a tuma lugar na Miami, e dianan 21 y 22 di September ultimo.
Señora Thiel a bisa cu, eigenlijk, nan a bay pa scucha kico ta e innovacionnan cu tin den e mundo di autismo, y locual nan por a constata cu e fundacion ta riba bon caminda, cu e diferente proyectonan cu nan tin, pero tambe cu e importancia cu samenwerking tin cu tur e diferente organizacionnan y stakeholders, cu e mester p’asina duna e cuido pa un persona neuro-divergente, autista, of cu tin cualkier otro limitacion of necesidad medico.
“Locual cu a bin dilanti eynan ta, eigenlijk, e importancia pa ta duidelijk den e rol di cada profesional den esaki.
Manera ta conoci, nos tin nos Congreso, cu nos ta haci anualmente dia 14 di October, y nos a wak cu, internacionalmente, ta duna e importancia pa mantene e rol di educadornan pa scolnan, y cu e sistema di educacion por brinda e educador e sosten necesario pa nan haci nan trabao bon, pero cu tur e rekisitonan pa esaki por sosode; dus,e sistema di cuido mester ta bon hinca den otro pero e sistema di señalamento, ora cu un educador mester di sosten, esaki mester ta accesible tambe.”
“Anto, nos ta wak cu no ta na Aruba so, pero internacionalmente esaki ta hopi importante. Pero tambe nos por a wak cu e exito di esaki ta ora cu e educadornan ta bon informa y tambe e banda di cuido mester ta bon informa di e retonan cu ta pasa den educacion, y cu un no por sigui desaroya sin e otro: e desaroyo mester cana hunto”, señora Carolina Thiel-Span, Presidente di FAA, a señala.
