ORANJESTAD (AAN): Esaki ta copia di un Carta Habri, cu e funcionarionan di Departamento di Labor a manda pa Gobierno. E ta bisa textualmente:
“Dos Minister, Dos Historia: Cual ta e berdad tocante e edificio na Paardenbaaistraat”
E reciente declaracionnan emiti den medionan di comunicacion local pa Minister Cicilia y Minister Dowers a trece un luz doloroso riba kico realmente ta pasando cu e edificio na Paardenbaaistraat, cu ta wordo comparti pa tanto departamento di DIMAS como DAO.
Mientrastanto cu tur dos mandatario a busca prensa pa duna splikacion, nan versionnan ta completamente contradictorio cu otro. Un di nan no ta bisando e berdad.
E narrativa cuestionabel: Minister Cicilia (Minister di Labor) a haci uzo di medionan di comunicacion pa afirma cu tin medidanan di emergencia y cu mester a evacua e personal di biaha. E narrativa aki ta wordo uza conscientemente pa hustifica e mudansa forsa y polemico di DAO pa Engelandstraat 33.
E ta bay mas leu ainda pretendiendo cu el a papia cu sindicato y cu e trahadornan di DAO, mientras e berdad ta cu e Minister nunca a presenta pa papia cu e trahadornan ni sindicato, y e nunca a pisa ni e edificio na Paardenbaaistraat ni e edificio na Engelandstraat pa mira e situacion cu su mesun wowo.
Silencio di Premier: E desesperacion y falta di oido a yega asina leu cu e trahadornan di DAO a dirigi cartanan formal na Minister President, buscando ayudo y un intervencion pa garantisa nan salud y siguridad.
Sinembargo, e resultado tabata lamentablemente e mesun muraya di silencio: ningun reaccion ni ningun ayudo a wordo brinda pa proteha e trahadornan aki.
E berdad exponi pa DIMAS: Sinembargo, e declaracion di Minister Dowers y e Maneho di DIMAS ta desmenti e version di Cicilia categoricamente. Nan a aclaria cu nan decisionnan y declaracionnan ta puramente basa riba testnan y resultadonan oficial haci pa diferente instancianan concerni. E testnan aki a wordo ehecuta específicamente pa verifica si tin cualkier peligro pa e salud di e personal den e edificio na Paardenbaaistraat, y tur e resultadonan a sali bon.
E realidad crudo: Un edificio malo pa forsa! Mientrastanto cu e personal di DAO tabata kier a keda na Paardenbaaistraat, e berdad lamentable ta cu awe nan a wordo horta di nan derecho di traha den un ambiente saludabel. E trahadornan a wordo poni bou di un presion enorme, ricibiendo ultimatum y te hasta wordo obliga pa bay den e edificio na Engelandstraat 33 bou di menaza directo di apela na Plichtsverzuim. E supuesto "emergencia" aki ta resulta di ta puramente un constructo administrativo pa tapa erornan y decisionnan imponi.
Minister Cicilia ta prefera pa gasta tempo y recurso purbando na adapta e edificio na Engelandstraat 33 cu for di inicio no ta cumpli y cu ta representa un peliger directo pa e salud di e trahadornan en bes di laga e personal sigui traha den un edificio debidamente construi cu ta cumpli cu tur norma di siguridad.
E realidad di e edificio na Engelandstraat ta alarmante:
(*) Presencia di Beskem (Schimmel/Mold): Tin problemanan serio di beskem den e edificio, cual ta representa un riesgo directo pa e sistema respiratorio y salud general di e trahadornan.
(*) Humedad Extremadamente Halto: E nivel di humedad den e espacio ta demasiado halto, loke ta fomenta mas schimmel y ta crea un ambiente di trabao desagradabel y no saludabel.
(*) Falta di Ventilacion Adecuado: E sistema di circulacion di aire no ta suficiente pa un espacio di kantoor cu e cantidad di personal cu mester wordo acomoda.
(*) Falta di Bentananan cu por Habri: E edificio no tin bentananan cu por habri pa duna ventilacion natural o pa sirve como salida di emergencia den caso di un calamidad.
(*) Deficiencia den Sistema di Siguridad contra Candela: Faltando e prevencionnan basico y obligatorio di siguridad (manera e ausenciadi un sistema di alarm di candela, deteccion di huma, y sprinklers adecuado).
(*) Ubicacion y Riesgo di Entorno: E cercania directo na un ijsfabriek industrial ta trece riesgonan di entorno adicional (manera e uzo di gassnan industrial/ammonia) cu no ta apto pa un ambiente di kantoor publico.
(*) Edificio Alquila vs. Propiedad di Gobierno: Contrario na Paardenbaaistraat (cu ta propiedad di Gobierno), Engelandstraat ta un edificio alquila cu no a wordo debidamente adapta ni construi pa e funcion specifico di un kantoor di gobierno.
(*) Incumplimento di Ley: E espacio no ta cumpli cu e leynan di ARBO, ni e rekisitonan legal pa garantisa un ambiente laboral sigur pa e trahadornan.
E personal di DAO a wordo obliga pa drenta den un espacio cu no ta apto pa wordo uza como kantoor, simplemente pa satisface un decision politico imponi cu menaza, mientras e berdadero raportnan tecnico di e instancianan competente ta demostra lo contrario. E pueblo di Aruba y e trahadornan merece transparencia y un trato husto.
