Funari ta lansa campaña pa recauda fondo pa sigui mehora servicio na clientenan cu limitacion fisico

Señora Brenda Rasmijn di Funari:

ORANJESTAD (AAN): Señora Brenda Rasmijn, Coordinadora di Fundacion Funari, durante un rueda di prensa a presenta oficialmente e campaña di recaudacion di fondo di Funari pa e aña aki. E iniciativa di e campaña ‘Un paso pa bida’ tin como meta pa recauda e fondo necesario pa e fundacion por continua cu su meta importante dedica na mehoracion di calidad di bida, bienestar y inclusion di personanan cu limitacion fisico na Aruba.

   Pa medio di actividadnan y servicio, e fundacion ta promove participacion, independencia y bienestar, mientras e ta combati isolacion social y contribui na un comunidad mas inclusivo.

   Fundacion Funari ta ofrece servicio di pasadia, transportacion, musica, obra di man, actividadnan social, plantacion, conscientisacion, rehabilitacion, terapia, ehercicio, entre hopi otro actividad mas cu ta contribui directamente na bienestar fisico, emocional y social di su clientenan.

   Rasmijn a splica cu, aunke Funari ta ricibi subsidio di Gobierno, e sosten di comunidad ta keda indispensabel pa e fundacion por mantene y sigui amplia e servicionan cu nan ta brinda. Pa e aña aki, Funari ta pone un enfasis special riba terapia y rehabilitacion di clientenan den rolstoel, cu e meta di fortalece nan movilidad, independencia y calidad di bida, particularmente den nan propio ambiente na cas.

   E campaña di e aña aki ta diferente y creativo. Durante e tres lunanan nos dilanti (september, october y november) Funari lo tin un campaña interesante cu e meta pa recauda fondo pa sostene e programa di rehabilitacion y e otro servicionan esencial cu e fundacion ta brinda durante henter aña.

   Fundacion Funari ta invita henter comunidad di Aruba pa uni su mes na e campaña y haci un donacion. Cada aporte, grandi of chikito, ta contribui pa Funari por sigui ofrece terapia, rehabilitacion, y oportunidadnan cu ta haci un diferencia real den bida di su clientenan.