Hose Figaroa, Presidente di Sindicato:
ORANJESTAD (AAN): Presidente di Sindicato FTA, Hose Figaroa den entrevista cu DIARIO a indica cu banda di e hecho cu ta premira un aumento di BBO entrante 1 di Januari 2023, ta un hecho tambe cu durante aña costo di bida a subi bastante.
El a agrega cu esaki tin un efecto riba poder di compra den e clase trahador. Pesey FTA como sindicato ta purba di compensa pa esaki den e contratonan colectivo (CAO) cu nan ta negociando.
Na 2022 a cera varios CAO. Normalmente ta purba di busca un balans, y no solamente un aumento den salario, pero tambe den aumenta e beneficionan secundario, tempo liber, etc, a bisa.
Den e caso aki, na enfoke ta door di e aumento den e costo di bida, di hisa e salarionan y te aworaki esey ta bin ta logrando basta bon, segun Figaroa.
Den sector turistico, por ehempel, tin un averahe di 3 pa 3,5 porciento di aumento pa e prome aña. Esey FTA ta logrando den mayoria di CAO y un averahe di aumento den 3 aña di mas o menos 8,5 porciento den sector turistico, a splica.
Den sector comercial a purba di bay den e mesun direccion y no ta espera cu esey ta bay cubri tur e aumento di costo di bida. Si ta wak e cifranan mas actual di Oficina di Estadistica te cu Augustus, tin un periodo di 7,7% di aumento y un periodo promedio di 4,3% di aumento di costo di bida.
Segun Hose Figaroa, e no ta kere cu ta bay tin mucho cambio den esey pa aworaki pa fin di aña aunke cu tabata tin reduccion den e prijs di combustibel cu ta haci un efecto. Pero na mesun momento tin un aumento den e prijs di coriente y pesey ta pronostica cu esey lo keda entre 4,5 pa 5 porciento averahe durante aña.
Pesey den e bista ey ta calcula un aumento di 3 pa 3,5 porciento pa compensa aunke cu e no ta cubri e porcentahe completo, pero e ta drecha e poder di compra di e trahador of alomenos e ta manten'e, a enfatisa.
