RIOHACHA: Diadomingo mainta, oficialnan di Marina Colombia cu ta investigando crimen organiza, hunto cu Forza Aereo Colombiano y Ehercito Nacional,
a logra di intercepta un speedboat tipo Go-Fast cu a caba di sali di Colombia mes, y tabata moviendo na distancia di 80 miya nautico noordoost di Riohacha, na La Guajira.
Esaki ta como 225 kilometer pabao di Aruba, riba lama teritorial di Colombia.
Den e speedboat Go-Fast aki tabatin 3 persona, di cual 1 ta Colombiano y 2 ta stranhero. A bin haya abordo 13 bulto grandi, conteniendo 323 paki cu cocaina aden, y nan tabata destina pa bay Republica Dominicana.
E cocaina aki ta pertenece na Clan del Golfo, y cu e accion aki, oficialnan a evita cu 950.000 dosis di cocaina a yega riba mercado internacional. Pues ta un perdida di mas di 14 miyon Dollar.
Autoridadnan Colombiano cu e accion aki a dal un golpi duro na narcotraficantenan di La Guajira. E personanan a keda deteni, y awor Ministerio Publico ta sigui cu e investigacion.
