ORANEJSTAD (AAN): Riba Diadomingo 21 di November 2021, e pareha Frank Trott y Getruida Trott-Maduro a celebra nan di 60 aña di bida matrimonial.
Tur cos a cuminza como 64 aña pasa ora cu un mucha muher bunita a cana pasa banda di e cas di mayornan di Frank. Frank a mire pasa, y a core bay pafo pa asina haya un mihor bista. E no por a stop di keda mira e mucha muher, y a cuminza fluit den su direccion.
Despues di 3 aña, Frank a tribi di puntre si e kier casa cune, y finalmente dia 21 di November 1961 nan a duna e “si” na otro na Stadhuis Oranjestad na Aruba.
Y awor 60 aña despues, tur hende ta celebra cu yen alegria y tambe cu e medidanan necesario, nan Boda di Diamanta. Manera cu Diamanta den Griego antiguo nifica “insuperable”, e boda aki tambe ta insuperable. Y cu seis yiu, 17 nieto, y 13 bisanieto, nan ta sinti nan bida uno rico y hopi stima.
Frank a traha como funcionario di Douane na Aruba te ora cu el a baha cu pensiun. Getruida a maneha e cas y crecimento di e muchanan. Frank y Getruida den nan añanan hoben a viaha y a goza hopi di bida. Awendia nan ta feliz di ta na cas ta traha hunto riba un puzzel grandi, y tambe mira con Mamai (e nomber cu yiunan ta yama Getruida) ta sigui produci delicioso cuminda den cushina pa henter famia.
Ora cu e yiunan, nieto-, y bisanietonan ta pasa bishita, Frank gusta bay tenta nan. Jokenan manera ‘Bo a wak e bleki?’ ta uno cu ta wordo conta regularmente den e famia. Bon mes cu e famia a costumbra cu esaki, y na nan turno nan ta tenta Tatai (e nomber di nan pa Frank) tambe bek.
Na nomber di yiu-, nieto-, y bisanietonan na Aruba y Hulanda, nan ta manda e mensahe aki: “Feliz 60 aña di bida matrimonial. Cu Dios sigui drama Su bendicion na abundancia riba boso, y duna boso salud pa por sigui stima, respeta, y tene pasenshi cu otro. Pa boso sigui nabega trankil y feliz den e boto matrimonial. Goza cu boso yiunan, nietonan, y bisanietonan”.
