Fraccion di AVP a bishita Fundacion Respaldo

ORANJESTAD (AAN): Dialuna mainta miembronan di Fraccion di AVP, sra Jennifer Arends-Reyes, Sra Stephany Sevinger y Sr Dennerich Kelly a haci un bishita na Fundacion Respaldo,

un organizacion cu ta ehecuta un rol esencial den e sosten y guia di personanan cu ta enfrenta reto relaciona cu salud mental riba nos isla.

   Durante e bishita, e parlamentarionan a haya un presentacion amplio pa mira di cerca e trabaonan cu ta wordo haci diariamente, puntra tocante e desafionan cu nan ta enfrenta, y tambe pa expresa nos profundo respet y apreciacion pa nan dedicacion den e lucha contra problema di salud mental na Aruba.

   Salud mental no por keda un tema secundario. E ta un prioridad real cu ta toca famia, mucha, hoben y adulto. Fraccion di AVP ta kere firmemente cu tin mester di mas inversion den prevencion, mas sosten pa organizacionnan cu ta haci e trabao riba veld y mas acceso na servicionan profesional pa tur persona cu tin necesidad.

   Fraccion di AVP ta reafirma su compromiso pa sigui traha na Parlamento pa fortifica e maneho di salud mental, amplia colaboracion cu sectornan y garantisa cu ningun hende no keda atras. Huntu nos por construi un Aruba mas fuerte, mas consciente y mas solidario. Fraccion di AVP ta gradici Sra Caroline Hart y Dr Kingsale di Respaldo pa nan tempo y trabao.