Fraccion di AVP a bay felicita comerciante Benchi Pick riba su cumpleaño

ORANJESTAD (AAN): Pa Fraccion AVP tabata un placer y honor den fin di siman, di cana drenta Caya Betico Croes,

y canando den caya grandi, a pasa cerca e conocido Sr. Benjamin “Benchi” Pick di La Moderna, pa comparti e celebracion di su 80 aña di bida.

   Masha stima den comercio y den pueblo, Benchi ta un hende kende a dedica su bida henter na trabao y servicio, ta un ehempel di perseverancia, humildad y amor pa pueblo di Aruba.  Fraccion di AVP ta gradicido pa tur contribucion cu Benchi a duna na nos comunidad.

   A toca honor na Parlamentario Jennifer Arends-Reyes pa bay dilanti ora nan a drenta e tienda, y haya Benchi na cashier ta trahando.  Nan a cuminza canta Happy Birthday, y varios hende mas den tienda tambe a canta hunto cu nan.

   Arends-Reyes a splica Benchi, cu nan a bin cerca dje pasobra nan kier a dun’e un aprecio.  “Nos kier a deseabo hopi salud, hopi bendicion, nos stimabo y pueblo di Aruba tambe stimabo, y danki pa bo contribucion, y hopi bendicion,” e Parlamentaria a bisa.  Por a mira cu señor Pick a keda basta emociona cu e sorpresa, regalo, y honor di top oficialnan di Parlamento cerca dje.  Entre esnan presente por a mira President di Parlamento, Marlon Sneek tambe.

   Feliz cumpleaños Benchi, hopi aña mas di bida, salud y hopi bendicion.