FPNM: Un Mayor su Guia pa Actividadnan Screen-Free pa Muchanan

Como mayor, bo kier pa bo yiu tin aceso na tecnologia pa asina nan por ta exitoso na scol y prepara pa futuro careranan.

Sin embargo, como mayor bo tambe kier pa nan tin un bida balansa y pa aprecia e balor di actividadnan offline. Treciendo un balansa den e uzo di tecnologia y media ta duna bo yiunan mas oportunidad pa tin interaccionnan y experencianan cu ta esencial pa un desaroyo sano. 

Ideanan pa actividadnan paden cu ta screen-free

1. Crea musica

Muchanan probablemente sa con pa pone musica riba YouTube, of otro medionan. Pero nan sa con pa toca un instrument? Introduci nan na diferente instrument y crea musica aunke cu kisas e ta zona malo. 

2. Obra di Man

Colecta cosnan rond di cas of bishita un tienda cu ta bende articulonan di arte. Asina bo tin material pa traha obra di man ki ora cu ta. Por practica con pa traha origami, of traha decoracion di pasco. 

3. Hunga weganan di mesa

Saca algun di bo weganan di mesa favorito of cumpra versionan nobo di nan. Pasa tempo cu bo famia ta hunga Monopoly of Mens Erger Je Niet, enbes di wak un movie. 

4. Crea bo propio obra di teatro

Duna cada miembro di famia un diferente rol pa hunga y invita famianan pa bin wak. Tambe por uza un caha di carton grandi pa traha un poppenkast y crea bo propio storia uzando popchi. 

5. Cushina cuminda

Prepara cuminda hunto. Hasta muchanan chikito por yuda laba fruta of berdura y prepara e mesa. 

Ideanan pa actividadnan pafo cu ta screen-free 

1. Cana cu bo famia

Crea un habito di bay cana regularmente. E por ta den bo bario, por bay Linear Park of banda di laman. Cana ta un manera facil di ehercicio cu muchanan por haci unda cu ta y no mester nuin material special. 

2. Hunga pafo

Tira un frisbee, scop bala, hunga cu hula hoop, bula cabuya, hunga kaki sconde. 

3. Planta un hardin

Planta diferente berdura y flornan. Plantamento ta siña muchanan di unda cuminda ta bin y con pa cuida algo pa e por crece. 

4. Bay lama

Bay lama ta un bon manera pa saca e energia for di bo muchanan. Sigur nan no lo sinti falta di tecnologia ora nan ta na lama. 

5. Bishita Biblioteca Nacional of Fundacion Hungateca

Bishita e biblioteca anto laga bo yiu scohe algun buki pa fia cu e por lesa na cas. Fundacion Hungateca tin un variedad di diferente co’i hunga educativo pa muchanan te cu 12 aña. E co’i hunganan aki tambe bo por fia. 

6. Campamento den cura

Set up e tent y bay campa hunto cu bo yiunan den cura di cas. 

E actividadnan aki ta un bon manera pa mustra nan cu ta posibel pa pasa pret sin nuin cu mester uza telefon, computer, television, tablet, etc.  

Fuente:https://childdevelopmentinfo.com/child-activities/a-parents-guide-to-screen-free-activities-for-kids/#gs.ayhdai

Pa informacion of pregunta por acerca Fundacion Pa Nos Muchanan - Cumana 2