Martijn Balkestein, Director di Camara di Comercio
ORANJESTAD (AAN): Den un entrevista cu DIARIO, Martijn Balkestein, Director di Camara di Comercio a indica cu awendia tin mas y mas entrepreneurs jong cu no ta mara mas na un trabao na un 'oficina' na manera di bisa, sino ta conoci como 'digital nomad', na unda nan por duna servicio online for di cualkier parti di mundo. Esaki sigur ta un tendencia internacional y hobennan profesional ta probechando di e facilidad aki.
Balkestein a bisa cu e cantidad di loke ta conoci como 'elementary jobs', na unda un persona no mester tin un estudio ta birando menos. Esaki por ta pa motibo di innovacion cu a causa un disminucion, pero tambe na final e nivel di trabao cu ta wordo ehecuta na Aruba, poco poco a hisa. Den su opinion esaki ta un tendencia hopi positivo.
Balkestein ta kere cu ta importante pa comunidad ta conciente cu internacionalmente ta wordo bisa cu innovacion por deshaci di 300 miyon cupo di trabao mundialmente, pero di otro banda e lo genera otro tipo di cupo di trabao. Loke ta nifica cu forza laboral mester tin mas conocemento den innovacion digital. Pa esaki mester percura pa nan sigui estudio y training, sino na dado momento nan ta core riesgo di wordo reemplaza pa dispositivonan moderno y tecnologico.
