Pueblo Hulandes a cuminsa cansa den sala di espera pa un Gobierno
*Rutte mester di cuatro pais mas pa e por bira dirigente di NATO
ORANJESTAD(AAN)—E situacion politico na Hulanda ta keda rondona pa basta suspenso pero tambe den un ambiente cu ta causa cansancio pa e Pueblo votador Hulandes.
Pa un persona bon noticia ta drenta. Ta trata aki di e actual Prome Ministro Hulandes Rutte, cu segun informacionnan di ayera, ya falta solamente sosten di cuatro pais pa e por considera su mes e persona cu lo bay dirigi Alianza Noord Atlantico cu a nace despues di Segunda Guera Mundial, cu ta NATO.
Informacionnan cu DIARIO ta ricibi ta indica cu pa e votadornan cu no ta forma parti di e mayoria creciente cu ta pensa cu a bira tempo pa e Gobierno pa cual nan a vota bira representante di Pueblo den Gobernacion Hulandes, pacenshi cu mundo politico a yega na un fin.
Un parti grandi y creciente di e totalidad di votador Hulandes kier pa e Gobierno den cual e voz di e partido di Wilders lo ta decisivo tuma asiento riba termino corto.
Mas y mas e situacion politico di Hulanda ta wordo influencia dor di personanan cu ta pensa cu demasiado tempo a pasa.
E formadornan di un Gobierno Hulandes nobo, Van Zwol y Dijkgraaf, a papia cu e partidonan PVV, VVD, NSC y BBB cu segun e informacionnan cu el a emiti, ta mustra cu e formacion ta un asunto di mil pregunta cu mester haya un contesta.
Por lo pronto no por spera cu un Gobierno Hulandes por wordo forma y tin tur indicacion cu formacion di e gobierno nobo, lo kibra record na un forma sorprendente.
Den e circulonan mas yega di Geert Wilders, e ganador absoluto di eleccion, ta reina un disgusto grandi.
E temanan mas importante cu ainda mester haya contesta fiho, ta esnan mas dificil y sigur ta mishi directamente cu e forma con ta bay gasta placa di e Pueblo Hulandes.
Por lo pronto tur dirigente di partido Hulandes, cu segun prome acuerdo alcansa sigur lo no forma parti di Gobierno Hulandes, mester traha riba e peticion di e informadornan pa presenta loke ta nan deseonan pa asina tin sikiera un rumbo pa nabega.
