Forma romantico cu Eldrick a propone matrimonio na Bianca

ORANJESTAD (AAN): E tabata un momento di proposicion pa matrimonio cu sigur lo keda inolvidable pa e pareha, y pa famia- y amigonan cu tabata presente.

   Eldrick Dijkhoff a haya e chens unico riba Diadomingo cu a pasa, pa pidi Bianca Leonardo pa contrae matrimonio cune.  Esaki tabata e fecha exacto cu nan tin 6 aña di noviazgo.  DIARIO a compronde cu e proposicion aki a wordo planea for di 2 luna pasa caba, hunto cu Joanne Oduber kende a bira e ‘planner’.  E ta un di e mihor amiganan di Bianca, y el a sa di mantene bon secreto durante preparacion.

   E proposicion a tuma lugar na Terminal di W Aviation, unda avionnan priva ta staciona.  Prome cu esey nan a tuma un viahe riba Aruba den avion.  Ora di baha bek, nan a haya e sorpresa.  Lo mas romantico ta e hecho cu Rocco Franken y Chris Kross a canta pa nan.  Ora nan a drenta e sala, e famia y amigonan mes tabata scondi patras di e palabranan di “Marry Me”.

   Bianca a bisa “si”, pues pronto nan lo bira Sr. y Sra. Dijkhoff.  E pareha ya caba tin un yiu hunto.

   Eldrick Dijkhoff ta un conocido pelotero di Baseball, y ta yiu di e conocido Chiki y Meredith Dijkhoff.   Esnan cu a organiza esaki ta gradici tur esnan cu a duna un man, esta Monica Kock, Ismari Arends, Huzam Photography, Aruba HiDreams Aviation, Paradera Party Center, Rocco Franken, y Chris Kross.

   Despues cu el a keda cla cu propone matrimonio, e pareha a anuncia cu nan tin e di dos baby na caminda, cu lo nace na December di e aña aki.