E ta traha cu hopi dedicacion y pasion pa yuda hende:
ORANJESTAD (AAN) – Lourdes Bramble, apart di e trabaonan cu el a realiza den diferente organizacion na Hulanda, manera DIARIO a publica
den su prome articulo di e entrevista aki cu Lourdes, tambe e ta traha na Arubahuis y e ta mentor di studiantenan cu ta bin studia den diferente ciudad na Hulanda.
Lourdes a conta nos cu e trabao di Mentor si, e tine te Juli-Augustus 2022, ora e ta baha cu pension y su trabao na Aruba Huis ta wordo cera.
“For di Aña 2004, ami ta mentor di studiantenan cu ta bin studia na e ciudadnan di Amsterdam, Harlem, Alkmaar, Almeere, y tambe Enschede, Zwolle, Diemen, Deventer y hasta, Apeldoorn”, e dama a indica.
Lourdes a haya hopi satisfaccion den henter su trayectoria laboral aki, y semper el a haci su trabaonan cu hopi dedicacion. E tin un curazon yena cu nobleza, y door di esey y di e forma con el a wordo lanta na Aruba, algo hopi singular den dje ta su pasion pa yuda hende cu ta den momentonan vulnerable.
“Semper mi ta bisa cu e trabao cu mi ta haci ta mas bien un hobby pa mi. Mi ta haci mi trabao cu hopi pasion y mi ta kere cu e experiencia cu mi tabata tin tempo cu mi a biba na Aruba, unda mi a wordo lanta door di un tanta grandi cu tabata gusta yuda hende. Hendenan cu tabata wordo maltrata, tur biaha tabata bin cerca nos, muchanan cu a sali na estado y ta wordo cori for di cas, semper tabata bin cerca nos. Dus, mi a lanta solamente sabiendo cu tur ora tin yen di hende cerca nos den cas; hendenan vulnerable cu a haya nan mes cu problema, y e tanta grandi eynan tabata opvang nan tur. Door di esey, mi a lanta cu un pasion grandi pa yuda hende”, Lourdes a conta nos.
El a sigui bisa cu semper e tabata kier haci algo extra pa hendenan di Aruba.
“No solamente studiantenan cu ta bin studia na Hulanda, pasobra den pasado ami cu mi casa, ken ta hopi conoci na Aruba (mi ta casa cu Appelnootje), nos tabata opvang Arubianonan cu tabata bin Hulanda pa motibo di docter, debi cu nan no por a haya cas. Semper mi tabata opvang nan, pasobra tin ora bo ta bin Hulanda, y ta hopi dificil pa bo yega haya un cas. Ora cu bo bin Hulanda pa docter nan ta pone bo den un hotel; bo no tin un bida cu bo por bisa esaki ta casi mescos cu Aruba. Bo ta sinta den cuater muraya riba un cama. Dus, semper cu tin Arubiano ta bin y no tin hende pa opvangnan, semper Aruba Huis ta yama mi, of Afdeling Sociale Zaken, y mi ta bay y ta tuma hende na mi cas sin ni un interes. Gewoon, pasobra mi ta haya cu nos tur, vooral Arubiano cu ta bin na un lugar straño, mester por sinti su mes manera na cas”, Lourdes a expresa.
“E satisfaccion di mi trabao ta pa duna hendenan guia, sostene y yuda nan; mi no ta hacie pa nan depende di mi, pero unico cos cu mi kier, ta pa hendenan siña cu nan mes tin un forza den nan barica y cu nan mes por logra haci tur locual cu nan kier. Solamente nan mester ta motiva, pa haci locual cu ta bon pa nan. Mi no ta regla nada pa ni un hende; mi ta mustra nan e caminda con pa cana. Esey tambe mi a siña den mi trabao: guia, sostene nan, pero duna nan e tools pa nan mes por mira unda e caminda ta y siguie”, Lourdes a señala.
