'Fontein' awor ta forma parti di e areanan protehi di Fundacion Parke Nacional Aruba

ORANJESTAD (AAN): Fundacion Parke Nacional Aruba (FPNA) como un fundacion independiente encarga cu e conservacion y maneho di areanan terestre y marino proteha na Aruba,

ta anuncia cu nan a keda cla cu e compra di “Fontein”, un di e unico areanan na Aruba cu un fuente permanente di awa dushi, haciendo esaki un area importante pa conserva.

            E compra a keda cla Diabierna, 26 di augustus 2022.  Awo cu “Fontein” ta forma parti di FPNA su areanan protehi, conservacion di diversidad natural den e area lo ta e tarea principal pa FPNA pa asina acomoda experiencianan sostenibel den Parke Nacional Arikok pa bishitantenan local y internacional keda conecta y comprometi cu naturalesa.

            “Fontein” ta situa pazuid di e cueba di Fontein, un area cu importancia geologico y arkeologico y tambe un di e cueba nan di mas conoci pa nos bishitantenan den Parke Nacional Arikok. Hofi Fontein a wordo transferi como propiedad priva pa comandante Gravenhorst y su famia rond di aña 1838, y despues e propiedad a wordo pasa pa varios diferente doño. E temponan aya, e fuente permanente di awa fresco a hacie posibel pa berdura y fruta fresco crece. Awendia, acumulacion di awa fresco por wordo mira patras di e cas cu ta un patrimonio nacional.

            “Ta un placer y privilegio pa oficialmente tin “Fontein”, un orguyo di Aruba cu inmenso balor historico y cultural, forma parti di e areanan protehi den Parke Nacional Arikok”, Norman Kuiperi, CEO Interino di FPNA ta comenta.

            Norman Kuiperi ta enfatisa “E team di FPNA a traha duro pa añanan largo pa reserve e fondonan necesario pa asina logra cumpra “Fontein”, y despues di un decada ta spaar y segura e fondonan corecto, awe nos ta orguyoso di por bisa cu “Fontein” un biaha mas ta den man di comunidad di Aruba despues di mas di 180 aña. E compra strategico di “Fontein” ta forma parti di FPNA su transicion di un organisacion di maneho di un parke, pa un organisacion di maneho di conservacion cu e compromiso di persevera, proteha y mantene un sistema ecologico cu ta diverso, saludabel y resiliente pa Aruba. Cu

anticipacion nos ta spera di por restaura e sitio aki cu hopi balor natural y historico pa nos bishitantenan por experiencia den e proximo añanan.”

            FPNA como un fundacion independiente actualmente ta encarga cu proteccion di aproximadamente 24% di Aruba su tereno natural y lo sigui busca oportunidad pa adkiri otro terenonan priva cu awe ta situa den areanan proteha pa asina por optimalisa y fortalece conservacion abase di sistema ecologico y biodiversidad.