Edwin Jacobs, director SVb:
ORANJESTAD (AAN) – Director di AZV, Edwin Jacobs, a declara den entrevista cu Matutino DIARIO, cu e recuperacion economico cu Aruba conoce despues di aña 2022 padilanti, y cu nos ta den dje, ta cooperando positivamente cu e fondo di SVb.
Esaki den sentido cu e fondo a conoce un surplus, cual ta bay den un reserva cu mester ta presente pa e momento cu mester wordo uza.
“Nos ta calcula (manera e grafico ta mustra) cu pa aña 2029-2030 nos ta bay tin surpluses. 2025 ya nos tin surplus, pa 2026 e ta bira menos, edad ta estabiliza na 65, y e ta duna un promedio di casi 1000 persona acerca y e gastonan ta aumenta. E entrada ta bay keda crece pero bo gastonan un tiki mas rapido cu entradanan, pues nos ta bay ta den deficit”, señor Jacobs a splica.
El a indica cu e linea ta mustra cu e reserva mientras cu tin surplus ta hinc’e den bo spaar pot, e ta mustra con e spaar pot ta subi, y por wak cu den añanan 30 bo ta cuminza come di bo spaar pot, y pa 2040 e ta bira bashi.
“Esey kiermen cu pa 15 aña nos tin reserva manera te aworaki calculonan a mustra.
E no ta nifica cu nos ta sinta warda te e 15 añanan yega, pero ya caba nos tin cu cuminza pensa kico nos ta bay haci pa nos por keda mantene e fondo di pensioen akinan pagable na interes di Pais Aruba” director di AZV a señala.
El a subraya cu AOV ta un riesgo pa Pais Aruba. “Pais Aruba no por mustra e companianan cu ta evalua nos credibilidad financiero, no por mustra cu gobierno ta atende cu e problema y bo ta haya bo cu mester paga interes mas halto pa e debenan cu bo ta haci pafo”, Jacobs a indica.
El a acentua cu ta importante pa Aruba keda mustra cu nos ta keda atende. “E intencion mester ta cu bo ta keda move bo spaar pot cada bez mas leu, p’asina e dura mucho mas.
Director di SVb a expresa cu por lo pronto e situacion no ta uno agudo, cu mester di medidanan rapido inmediatamente.
