“FIXI ta bayendo hopi bon y mi ta sumamente contento cu el a lanta cabes”

Robby Rosel, Vocero BCI:

*A ricibi mas di 3 mil bishitante 

ORANJESTAD (AAN) — Den entrevista cu señor Robby Rosel, Vocero di Bureau City Inspector, el a bisa cu (e aplicacion) FIXI ta bayendo hopi bon, y e ta sumamente contento cu e ultimo lunanan aki a lanta cabes y nan a ricibi mas di 3 mil bishitante.

FIXI ta haciendo su trabao, mandando mensahe pa cada un di e Inspectornan kendenan di biaha ta atende e trabao aki.

“Tambe mi tin cu bisa cu e trabao cu ta cay bao di Bureau City Inspector nos ta hacie, cual cu ta e mantencion di camindanan publico limpi, kitamento di autonan chatara, tambe loke ta awa di pos, y loke ta matanan cu ta crece cant’i caminda nos ta mand’e pa e departamento DOW, cu ta esun concerni”, Robby Rosel a indica.

El a agrega cu BCI a haya reclamo tocante barinan di sushi y nos a manda esaki na Serlimar. “Cada departamento cu nos haya riba FIXI nos lo mand’e automaticamente pa e Departamento concerni p’asina nan por traha riba e keho”, Rosel a reitera.

El a enfatiza cu tur loke ta di FIXI, cu ta cinco dia di trabao, BCI ta percura pa e keda cla, limpi y bunita, y nan ta pon’e riba facebook di BCI. Pero e trabaonan cu no ta cay bao di dje nan ta mand’e pa e departamento concerni y esey ta keda na cada un di nan pa termina cu e trabao ey.