Den cada distrito tin un Recherchedienst:
ORANJESTAD (AAN)—Den entrevista cu DIARIO, Fiscal Patrick van der Biezen a acentua riba e hecho cu den Ministerio Publico, nan ta atende tur caso, di cual denuncia ta wordo haci, relaciona cu menasa por ehemplo, pero cu mester tin prueba, naturalmente.
“Pero nos no tin e capacidad, na prome lugar na Ministerio Publico pero tambe na KPA, di atende tur caso. Nos tin cierto cuponan y Gobierno tin ora ta duna nos loke ta wordo pidi. Esey kiermen, automaticamente, cu Ministerio Publico no por haci e trabao manera nos ta desea”, Fiscal v/d Biezen a señala.
El a menciona tambe cu ora un hende ta haci denuncia, en principio t’asina cu e procedure ta yega na Recherche. “Manera nos sa tin diferente dienstnan di recherche na Aruba den distritonan. Nos ta parti Aruba den cuater distrito: Noord, Santa Cruz, Playa y San Nicolas. Cada Distrito tin su mes Recherchedienst, y obviamente ora ta haci denuncianan tin un Fiscal den cada Distrito, cu ta atende esakinan”, Fiscal van der Biezen a relata.
E Fiscal a agrega cu si un hende haci un denuncia y nada no a pasa cu ne, por acudi na Ministerio Publico, si e tin copia di esey ta wak e ora pa atende cu Recherchedienst. El a bisa cu ta importante cu tin un screening process cu ta wordo haci y ta wordo gescreen tin ora door di un Fiscal.
“Den caso di menasa, si tin prueba, e caso ta wordo atendi. Ta bon pa remarca tambe, cu no tur menasa ta segun e Codigo Penal, pasobra tin cierto menasanan cu tin cierto rekisito cu mester yega na dje, pa bo por tin un menasa penalmente” Fiscal van der Biezen a comenta.
Como un ehemplo, el a indica cu si bo bisa un hende: ‘ora mi topa bo pafo, bo ta wak kico ta pasa cu bo’ no ta concreto suficiente pa bisa cu e ta un menasa penalmente. “Nos por sintie cu e ta fastioso, bo ta sinti bo cu ‘e ta menasando mi’ y e sentimento ey no ta dushi. Pero, huridicamente, e no a yega ainda na un etapa di ta un menasa penal, segun e sistema di ley. Pasobra e articulo di ley di menasa ta menciona algun actuacion cu lo mester tin pa bo lo uza como menasa”, Fiscal van der Biezen a señala.
Si un hende ta lanza e palabranan “mi ta bay mata bo” e ta un menasa, evidentemente, contra e bida di e persona. Of menasa un hende cu maltrato severo, tambe. ‘Kima mi ta bay kima bo cas’ tambe ta un menasa penalmente. “Pues, ta depende di ki palabra ta wordo uza, y no palabra so, actuacion tambe, por ta un menasa, y esey un persona por bisa cu el a haci un denuncia di menasa, pero no a scucha nada mas, por ta pasobra mester tin prueba di menasa.
