Final di e di 13 edicion di e proyecto Dream Dare Do y di 18 edicion di Gang di Arte Aruba

 Tema Central: “Union”

Seccion Hubentud den Movecion a presencia a fabuloso presentacion di e Proyecto Dream Dare Do (13 edicion) y Gang di Arte (18 Edicion), cu a tuma lugar Diabierna ultimo den Cas di Cultura.

E anochi a cuminza cu un bunita sorpresa cu ta e docente Jose Manuel Nuñez cu a habri e presentacion interpretando, na un manera mahestuoso, e famoso cantica ALELUYA. 

John Freddy Montoya a duna nos seccion e siguiente relato: 

“Un Proyecto den cooperacion entre Departamento di Cultura Aruba conhuntamente cu Popcorn Dancers Aruba bao direccion di sr Freddy Tromp.

E ganadornan di e edicion aki, lo representa Aruba den Kunst Bende na Hulanda na aña 2025.

Tabata tin 2 siman di tayer di preparacion cu maestronan SHoben entre otro di Italia, Spaña y tambe Aruba na unda a haya diferente elemento y disciplina artistico pa desaroya manera baile, teatro, musica y arte visual,  na final di e tayernan tur participante mester a crea un obra original cu e tema central: UNION.

Como grupo Invitado special for di nos ruman isla Bonaire nos tabata tin e hobennan talentoso di Ace Bonaire: “Art Culture Education Foundation”.

Tayernan cu a ser duna durante e proyecto Dream Dare Do cual ta: Poesia bou di guia di Diogo Pulzoni di Italia, Baile contemporaneo bou di guia di Camilla Salomon di Italia, Bachata y Flamenco bou di guia di Noelia Frias Nieto y Cristina Lazaro Garcia di Spaña, Afro bou di guia di Malbin Silverio, Break Dance bou di guia di Edric Magalona, Break Dance bou di guia di Joel Recappe Aruba, Latin Fusion bou di guia di Valeria Leoni Aruba, Brazilian Funk bou di guia di Shaquille Buckley Aruba, Dance Hall bou di guia di JM Aruba, Musical Grease bou di guia di Jose Solera di Spaña y Jason Wester di  Aruba y Simadan bou di Guia di Zoё Bernardina di Bonaire.  

RESULTADO FINAL: 

Di 3 luga: Dynamic Dancers (Neissa Civil, Qishayra Muller, Kenya van Dinter, Valentina Merveille, Jason Wester )

Di 2 luga: Unity Dance Crew (Clifton Wong, Jeannique Flanders,  Aanya Asran, Katelyn Lejuez, Jilliianne Nicholls)

Ganador Absoluto: Super Starts (Erick Jesus, Nuirick Werleman, Shanté Mardenborough, Millyanne Wilson, dy-shanely courtar )”. 

DEPARTAMENTO DI CULTURA: 

FINAL Competencia Hubenil Gang di Arte Aruba 2024 

 Despues di dos siman di diferente tayer riba diferente disciplina manera e.o. Baile, Teatro, Musica y Arte Visual a wordo duna pa instructornan local y internacional. Durante di e tayernan, e hobennan ta siña descubri nan talent scondi y asina ta cuminsa desaroya esaki, pa medio di traha un obra propio, creativo y orginal. E presentacion y creacion mester carga e tema central cu pa aña 2024 cual ta “UNION”. E tayernan a wordo brinda pa Dream, Dare, Do, un Proyecto den cooperacion cu Gang di Arte Aruba di Departamento di Cultura.

Un total di XX  grupo lo ta participando den e competencia den diferente disciplina artistico. Di parti Popcorn Club Aruba y Departamento di Cultura kier gradici tur participante.

Durante di e anochi aki, tambe a conta cu presencia di e ganadornan di Gang di Arte Bonaire cu a bini Aruba pa a forma parti di e grandioso intercambio artistico hubenil aki.
E ganadornan di e edicion Gang di Arte 2024, tabata tin e oportunidad di ta e cara hubenil cu lo sigui profila nan talento durante henter aña den diferente actividad nacional como internacional. 

Departamento di Cultura conhuntamente cu Fundacion Popcorn Club Aruba a duna e hobennan di Ace Bonaire, un caluroso bonbini na e grandioso trayecto di preparacion di e proyecto den cooperacion Dream, Dare, Do - Aruba & @Gang di Arte Aruba 2024 cu tema central UNION.