Den Centro Caiquetio na Paradera
- Food Extravaganza y tambe Silent Auction
ORANJESTAD (AAN): E programa di “Meals on Wheels” na Aruba, cu ta wordo patrocina pa Aruba Methodist Circuit, ta andando caba pa 56 aña largo, y ta cla pa drenta nan di 57 aña di yuda puebllo. Nan a sirbi hopi hende riba e isla, kendenan no por sali di cas, adultonan mayor, y famianan cu no por produci cuminda pa esnan bibando na cas.
Diferente Docter y trahadornan social ta duna e nomber di personanan cu ta eligibel pa e programa, pa ta sigur cu hendenan cu mester di yudanza, ya no ta hayando ayudo di otro organizacion.
Nan ta dunando dos cuminda cayente tur siman, riba Diamars y Diabierna, tur cuminda fresco cushina, y hasa e dia cu nan ta haci entrega. Cuminda ta wordo prepara na John Wesley Auditorium na San Nicolas, cu ta pertenece na Aruba Methodist Circuit.
Aworaki e programa di Meals on Wheels ta sirbiendo 80 persona den comunidad, y nan tin un lista di espera tambe.
E luna aki nan tin mas fondo, y mas trahador pa yuda cu nan tempo liber pa asina Meals on Wheels. Tambe nan kier yuda aun mas hende, y pesey mas placa ta necesario pa por duna mas servicio na esnan den necesidad.
Evento grandi: Pa por yuda recauda fondo, nan tin planea un dia di “Food Extravaganza y Silent Auction” riba Diasabra 29 di November 2025 na Centro Caiquetio na Paradera. Esaki ta e di 5 anual evento di Subasta Silencioso. Tur esaki pa recauda fondo, cu yudansa di diferente empresa cu ta yudando cu cuminda.
For di 4:30 pm te cu 8:30 pm, nan lo ta bende cuminda. Di West Deck Restaurant, nan lo bende Sopi Carni y Vegetal di 16 oz. cu Pan Bati pa diescinco Florin. Lo bende 2 fish cake cu sauce tarragon pa diesdos Florin.
Di O’Niels Caribbean Kitchen lo bende plato di 2 mochi di pisca, cu aroz, salada y banana pa bintidos Florin. Di Casa Tue lo bende Pizza di Ham & Cheese y cada slice ta siete Florin. Di Renaissance Resort lo bende pastechi pa cuatro Florin, croket pa tres florin y cincuenta cen.
Di Domino’s Pizza lo bende Pizza di Cheese na seis Florin, Pizza di Pepperoni na siete Florin. Di Delimar Peruvian Restaurant lo bende Chaufa Chicken Fried Rice den plato pa diesseis Florin. Di Santos Coffee lo bende Muffins di Blueberry y Bacoba pa cinco Florin. Lo tin mas postre tambe na cinco Florin, incluyendo bolo di chuculati, bolo di cherry, upside down cupcake di anasa, cuki, y mas.
Lo bende refresco y Maube y Sorrell pa cinco Florin.
Silent Auction tambe: E aña aki pa e Subasta Silencioso, nan lo tin hopi mas pa temporada di Pasco. Lo tin paña nobo, zapato di varios pacus local, pochi pa pone mata aden, glas decorativo, certificadonan di restaurant, certificado pa haci cabey, pa haci huña, chiropractor, bril, cruise pa cena, prenda, crema di man, productonan di maple di estado di Maine, honing, pet spa, articulo pa mascota, actividadnan recreacional manera gym, go cart, trampolin, articulonan deportivo firma, espacio pa muchanan hunga, y mas.
Entretenimento lo ta di Lady DJ, tambe Nico Connor cu su steelpan, Gaita Mensahe di Alegria, Young@Heart Line Dancers, y tambe lo tin Dino Jump, y mas wega pa muchanan te cu 4 aña, y tambe lo tin algun doorprize.
Placa pa ta wordo uza pa cumpra y prepara cuminda, y tambe pa e Bus cu ta ser uza pa entrega cuminda. Tur fondo di Meals on Wheels ta wordo controla cada 6 luna. Por haci donacion directo na Aruba Bank #2019966.
Por contact Valerie Connor tambe via WhatsApp na 562-8322 pa haya of duna informacion. Dos gran ayudante, Sue y Mike Faulkner mes lo pasa piki donacionnan.
