Señora Desiree Thode-Helder:
ORANJESTAD (AAN) Directora di Departamento di Adulto Mayor, den entrevista cu Matutino DIARIO, a menciona cu e tabata tin un combersacion cu Colegio EPI (Educacion Profesional Intermedio), pasobra hopi biaha e studiantenan ta mustra interes pa sigui un carera di zorg, pero esaki ta bira hopi largo.
Pero tin ora e ta depende di e situacion, si e studiante tin cu bay traha e ta stop di bay scol, pasobra toch nan tin cu keda un par di aña pa caba scol y nan kier pa e scol bin cu opleidingnan mas cortico.
Na fin di October tabata tin un presentacion di Colegio EPI hunto cu Summa College tocante un opleiding nobo cu un persona por cuminza, of personanan cu ta trahando caba den Cuido por haya un bijscholing, y ta haya mas informacion di loke e zorg ta encera, y envez di keda sinta den banki pa añanan largo nan por haya certificado den cuido basico, pa cuminza traha den cuido. Esaki ta un programa cu Summa College di Hulanda, pa tur e Islanan y cual certificado ta reconoci. Na Aruba e ta bao capa di Colegio EPI.
Helder a splica cu un persona cu no tin educacion mes den area di salud, por cuminza pa haya un certificado di basiszorg, y haya instruccion tocante con pa baña e persona, con pa bisti’e, con pa atende cu su kehonan, por ehemplo si tin dolor, hamber, etc. E Basiszorg ta importante pa haya mas informacion y bira mas experto den cuido.
E diploma otorga ta reconoci door di Hulanda, Sint Maarten, Aruba, Bonaire, Curacao. Importante ta cu e studiante no tin cu keda añanan den banki di scol sin por traha.
