Filomena College MAVO a organiza un exitoso 'Opendag; pa mayor y mucha di scol basico

Cabesante Raquel Lampe a splica:

ORANJESTAD (AAN) – Juffrouw Raquel Lampe, Cabesante di Filomena College MAVO, den entrevista cu DIARIO a duna informacion tocante e 'Opendag', cu e scol tabata tin, recientemente.

Lampe a informa cu nan a haci un invitacion na mayornan cu tin yiu den scol basico pa nan pasa bishita Filomena College MAVO, pa nan tin un bista tocante e scol, y nan por a drenta den e localnan unda diferente les a wordo duna na e alumnonan, na unda e mayor hunto cu nan yiu por a experiencia dunamento di les.

            Mayor por a haci pregunta, y nan a haya un presentacion general di tur loke ta encera ora su yiu ta bin na Filomena College Mavo.

I           nscripcion pa e siguiente aña escolar (23-24) ta tuma lugar dia 1 di April. Mayornan a haya un folder cu informacion cu tur informacion tocante esaki, pa nan por sa kico nan tin cu haci.

            E docentenan, director y director suplente a pasa puntra e mayornan invita tocante con nan experiencia a bay y a duna nan algo pa yena pa duna scol feed back.

            E alumnonan ta gusta hopi e lesnan practico, kiermen cu nan ta siña y haci. Asina señora Lampe a menciona. “Nos ta pusha na scol pa nos uza mas e talento di nos alumnonan, y saca nan potencial. Hopi biaha nan ta duna e feed back cu nan ta gusta e ambiente familiar cu nan ta haya na scol”, el a agrega.

Pa e periodo venidero nan ta preparando pa examen, pues no tin mucho actividad aworaki. Plannan pa futuro Filomena College Mavo tin hopi, segun e cabesante a indica. E docentenan a caba di pasa den tayernan di trabao pa cuminza prepara pa cambionan cu mester bin den enseñanza.

            Pa Filomena College ta nifica e caminda unda cu nan kier bay, cu ta trata mas e parti cu nan ta yama “un arbeid school”. Atrobe nan ta bay saca e potencial di e alumnonan den e “richting” cu nan ta, den kico nan ta miho. Pesey nan tin guia di Hulanda, door di De Rolf Groep, y mester prepara bon e team di docente pa nan por pasa over bon, pa e alumnonan. Y den futuro e scol kier haci cambionan internacional cu otro scolnan, entre otro nan ta bezig cu un scol na Lithuania pa nan haya docentenan di nan pa bin Filomena College pa asina crea e fundeshi pa bay den un direccion nobo.