Festival di Buki pa Mucha: Autornan ta bay bishita 54 scol na Aruba

ORANJESTAD (AAN): E apertura di Festival di Buki pa Mucha ta bay ta Diasabra dia 4 di November pa 5’or di atardi y durante un conferencia di prensa Diamars mainta Zetsia Ponson,

coordinadora di e festival, a splica cu e celebracion di e di 31 edicion di e festival ta bay ta na Cas di Cultura, unda cu e librerianan local ta bay ta presente.

   Pa cada compra di 5 florin of mas, bo ta ricibi e buki, Na Cas di Carlos y Carmen completamente gratis.

“E show ta cuminza 6’or y ta consisti di e muchanan di Princes Amalia Basisschool, kendenan lo balia riba e cantica di e aña aki, ‘Mi Buki Mi Cas’”.

   Dazzling Dancers tambe ta bay tey, Cacique Macuarima ta bay haci un baile, mientras cu Bon Nochi Drumi Dushi tambe ta bay duna un presentacion, segun Ponson.  Banda di e apertura, e autornan invita lo bishita tur scol entre 6 cu 10 di November.  En total ta 54 scol na Aruba cu ta bay ricibi bishita di e autornan. E autornan di Aruba ta Vanessa Paulina, Irmgard Frans, Olga Buckley, Emerita Emerencia, Ruthy Vrieswijk, Esmeralda Tromp-Jacobs, Sheila Werleman y Desiree Correa.

   Di Boneiro ta bay tin Boi Antoin y Denise de Jongh-Rekwest y di Colombia Pedro Vargas ta bay tey. Di Corsow ta bay ta presenta Crisen Schorea y Alvin Inecia-Tio Ali, mientras cu di Hulanda ta bay tey Jeroen Hoogerwerf y Pieter Koolwijk. E autor di Sint Eustatius cu ta bay bishita e scolnan di Aruba ta Misha Spanner.

   Durante e conferencia di prensa Valery Figaroa tambe a hiba palabra y a haci un invitacion na tur mucha pa actividadnan atardi na Biblioteca na Playa y San Nicolas, for di Dialuna te cu Diahuebs di 3’or di atardi te cu 4’or. Entre otro e autornan ta bay ta presente tambe. Figaroa a menciona tambe e famoso boekenmarkt cu tin na Biblioteca di Dialuna pa Diabierna, unda cu bo por cumpra buki pa 1 florin.