Festival canto Himno y Bandera 2022 lo conta cu 41 participante

Dia 5 di Maart riba Plaza Betico Croes:

ORANJESTAD (AAN) – Den conferencia di prensa reciente, señor Aaron Arenas, organizador di e Festival Himno y Bandera, infantil, hubenil y Adulto, hunto cu Jessica Croes, Harry Croes y Kimberly Boekhoudt di SETAR a haci e tiramento di lot pa e Festival 2022.

Pa e Festival aki lo participa un total di 20 participante pa e categoria infantil/hubenil y seis agrupacion musical, y den e categoria adulto tin 21 participante y diez agrupacion musical.

E festival, e aña aki, lo tuma lugar dia 5 di Maart na Plaza Libertador Betico Croes, cu e siguiente secuencia:

AGRUPACIONNAN

1.Alma Folklorico, 2. Grupo di Amigo, 3. Sonido di Antaño, 4.Curazon pa Aruba, 5. Shine Music, 6. Sabor Crioyo, cu ta bay acompaña 20 participante infantil/hubenil.

ADULTO:

Pa loke ta e categoria Adulto, ta bay tin 21 participante cu lo wordo acompaña musicalmente pa:

1.Tipico Caricia, 2. Shine Music, 3. Sonido di Antaño, 4. Tipico Suona, 5. Tipico Amigo, 6. Alma Folklorico, 7. Curazon pa Aruba, 8. Tipico MA, 9. Nos Folklore, 10. Tsunami.

Arenas a menciona cu tin un cantidad di ganador den festivalnan anterior cu ta bay participa, manera German Hernandez, M. Almari, Stephany Gravenhost den duo cu su mama, Elton Kelly, y diferente otro nomber cu semper ta resona den  festivalnan di Himno y Bandera.

Aaron Arenas a expresa cu e ta contento cu Aruba ta bayendo bek na loke ta normalidad y cu e festival lo tuma lugar riba Plaza Betico Croes, y e ta kere cu esaki ta loke ta haci cu tin menos cantante cu tabata como 80 cu semper a bay pre-final y despues final.

“Pero e biaha aki nos ta conforme y gradici, y hopi contento cu e agrupacionnan musical, lidernan di banda, mayornan, participante, compositor, areglista, pasobra sin e industria creativo aki, cu ta nan, lo no tabata tin festival. Y nos mester ta contento cu ta bay conoce 41 cancion nobo dedica na nos Himno y Bandera, pa loke ta aña 2022” Arenas a conclui.