Festehando e di 50 aniversario di servicio di Lily Gonzalez

Trahador balioso di DeWit & VanDorp

ORANJESTAD (AAN): E siman aki, esnan di DeWit & VanDorp tabatin e honor di celebra señora Lily Gonzalez su 50 aniversario y como parti di e famia grandi di Jolley Holding Aruba.

   E tabata un mainta cu yen di recuerdonan, anecdota nan y hendenan cu den un forma of otro a forma parti den e trayectoria di e carera di Lily of cu Lily a sa di forma parti di esun di nan. Gerencia, coleganan y famia a uni den e celebracion di e gran logro aki.

   Sr. Gilroy Tromp a comparti e storia di Lily su carera impresionante cu DeWit & VanDorp Stores. Lily a cuminsa traha como recepcionista/Directie Secretasse te cu a asumi e puesto di Recurso Humano di compania pa e ultimo 22 aña nan.  Señora Joanne Croes a trece padilanti su admiracion y lealtad pa cu e compania y su manera inigualabel pa maneha e personal.

   Un momento emocional tabata ora cu Sr. Daroy Nunes a duna Lily un danki grandi pa tur e aña dushi cu nan a traha hunto y ta spera cu por sigui pa un tempo mas. Finalizando na nomber di De Wit Stores y Jolley Holding Aruba Señora Ica Jones a presenta Lily cu un plakkaat y certificado pa conmemora su 50 aña di servicio.

   Esnan di DeWit & Vandorp kier a enfatisa e importancia pa sostene e crecimento di nan empleadonan. Sigur 50 aña no ta poko tempo pero Lily a demostra cu respet, disciplina, perserverancia y trabao duro sigur nos tur por yega leu den un compania.

   Gerencia a manda bisa danki na tur e coleganan y famia presente pa e celebracion di 50 aniversario di Lily. Pabien, Salud y un Danki grandi na Lily.