ORANJESTAD (AAN) – Fernando Dirksen, Relacionista Publico di Food & Beverage Association, a keda masha contento y satisfecho cu e resultado di e Job Fair 2023.
Den entrevista cu DIARIO, Dirksen a bisa cu e tabata un exito grandi unda hopi hende a aplica pa e trabao cu nan ta interesa den dje, y manera el a bisa ora cu a anuncia e
evento, tin mas di 400 cupo di trabao habri, y mas di 50 compania cu tin mester di trahado tabata presente.
El a bisa cu e oportunidad di haci pregunta tocante e trabaonan cu tabata tin disponible tabata bon probecha. Hopi hende a haci pregunta y haya informacion tocante esey.
El a reitera cu e demanda mas halto cu tabata tin ta pa cushina cu cleaner, pero tambe den otro sectornan di horeca. El a bisa cu lo seguidamente lo haci un conteo di tur e hendenan cu a presenta pa haci aplicacion y lo tin un pre-inscripcion. E companianan lo tuma contacto cu e personanan cu a solicita y despues lo informa cuanto di nan lo a wordo tuma den servicio, mescos cu a haci aña pasa.
Dirksen a indica cu pa otro aña e Feria di Trabao lo ta mas grandi y lo tin mas sala habri pa e evento pasobra lo bay tin mas hende interesa den esaki. Aworaki, hopi hende tin un necesidad grandi den F&B. Ya caba aña pasa cu a cuminza mas chikito tabata tin hopi interes, y e aña aki a bira mas grandi y pa otro aña e lo crece ainda mas.
