ORANJESTAD (AAN) -- Un aspecto hopi interesante cu señor Fabian Werleman a trece dilanti den entrevista cu DIARIO, ta cu no tin un asina yama “plan B” pa produci sanger no humano . Den su 27 aña trahando den Banco di Sanger el a yega di scucha cu tin algo nobo ta bin
, pero te awendia tin nada!
“Kico e ser humano su curpa ta produci ta unico. Cada hende cu ta traha su sanger ta duna algo di dje pa un otro persona cu mester di dje. Pues e ta algo cu nos no por produci di un otro forma”, Werleman a señala.
PALABRA DI GRATITUD:
Finalmente, señor Werleman a expresa palabranan di gratitud pa tur donante activo cu Banco di Sanger tin, y cu ta contribui enormemente cu e pueblo di Aruba. “Mi ta gradici tambe mi team akinan, tur mi coleganan cu ta haci un trabao inmenso pa nos tin e producto na e nivel di calidad cu nos merece pa e pueblo aki y, claramente, mi ta keda gradici nos donantenan, y pidi nan tene hopi pasenshi cu nos, door cu nos ta yama nan asina hopi frecuente, pa duna sanger”, Fabian Werleman, Coordinador di Banco di Sanger a conclui.
