Fenomenal tabata e Mercado di Santa Rosa

ORANJESTAD (AAN): Tabatin cantidad di fruta, berdura, mata, y hopi cos mas na benta durante e popular Mercado di Santa Rosa.

   Gerencia y funcionarionan di Santa Rosa, a expresa con orguyoso nan ta di e agricultornan local.  Pasobra aunke tabata un periodo di basta secura, nan a sigui planta cu amor y dedicacion.

   Resultado ta un monton di fruta, e.o. Sorsaca, Milon, Papaya, Lamunchi, y berdura fresco.  Tambe tabatin bendemento di mata, juice fresco di fruta primi, y mas.

   Santa Rosa pesey ta manda un danki di curason na tur productornan y esnan cu a pasa bishita e Mercado di Santa Rosa. Un danki na tur e funcionarionan di Santa Rosa cu a yuda durante e actividad, y den e siman anterior. Pero un danki extra special na e duo dinamico cu ta Randy Maduro y Carola Geerman, kendenan tabata encarga pa organiza e mercado y pop-up markets.  Nan a traha duro y den fin di siman por a celebra otro exitoso Mercado Santa Rosa tras di lomba.