Aruba mester observa desaroyonan mundial den plannan local
*Ukraine ta un deposito di materia prima nuclear y di energia limpi
*Rusia a kibra pacto mundial pa stroba gigante mundial Ukraine
ORANJESTAD (AAN) — Februari 2023 ta bira un luna determinante pa paz mundial, cu ta un asunto mucho mas dificil cu hopi hende ta kere.
E conflicto Ukraine ta bay mucho mas leu cu un simpel deseo di Vladimir Putin pa crea un imperio Ruso sin mas.
Mundialmente Rusia a crea e pensamento cu e ta e poder grandi cu a resta for di Union Sovietico, cu awe Putin kier bolbe forma cu conquista di paisnan cu un dia tabata parti di Union Sovietico.
For di momento cu Union Sovietico a stop di existi, mundo ta sigui papia di Rusia a base di e hecho cu den pasado Rusia tabata e nomber cu tabata duna Union Sovietico na diferente idioma, sigur na Papiamento den mayoria di caso.
E situacion mundial actual a wordo ocasiona dor di un suceso importante na final di Segundo Guera Mundial, cu a haya su fin a base di e descubrimento di hende di e potencial di e reaccion quimico ora splits e parti mas chikito di materia (splits atoom).
“Little Boy” ta e nomber di e prome arma nuclear cu a wordo uza durante guera. Pa por produci e tipo di arma aki mester di e materia Uranium, cu a bira uno di e materianan principal mas importante na mundo.
E tecnica di arma nuclear a cambia den transcurso di tempo, pero e necesidad di Uranium no a cambia.
Esaki ta haci cu paisnan productor di Uranium ta hunga un papel importante den e preservacion di paz of desaroyo di guera na mundo, manera na diferente ocasion DIARIO a trece dilanti.
Final di Segundo Guera Mundial no solamente a encera cu a alcansa un tratado di paz pa un mundo na guera, pero tambe pues cu hende a conoce metodonan nobo pa guera cu desaroyonan riba tereno cientifico y di tecnologia.
Lidernan mundial a reconoce e peliger.
Na momento cu Union Sovietico a stop di existi, areglonan special a wordo introduci den e situacion mundial nobo pa Ukraine.
E Memorandum di Budapest a duna luz dia 5 di December 1994 na Budapest, ora e paisnan Belarus, Kazakhstan y Ukraine a bira parti di e Tratado di No Profilacion di Armanan Nuclear.
Ukraine tabata e centro nuclear di Union Sovietico pero a debolbe tur arma nuclear na Rusia.
Den e tratado a wordo firma con ta tene cuenta cu e interes di otro. Den caso cu uno di e paisnan wordo menasa cu agresion cu uzo di arma nuclear, nan mester busca e asistencia imediato di e Conseho di Seguridad di Nacionnan Uni.
Pa medio di e tratado Rusia a reconoce existencia di Ukraine pues. Ukraine, cu ta un pais rico na tesoronan natural y capaz di crea un economia importante pa su mes y entrega cantidad di producto na otro pais.
E produccion di Ukraine ta consisti di cuminda, di mineralnan, di petroleo, pero tambe di Uranium necesario pa produccion di energia nuclear pa entre otro generacion di coriente.
Na e momentonan aki un parti importante di e rednan di coriente na Ukraine ta traha riba energia nuclear y e pais tin un plan di $333 Miyon pa uza Uranium pa percura pa generacion di su propio energia na forma completo.
Mientrastanto Ukraine a bira un centro di entrega di cantidad di material pa mundo liber y tabata sigui aumenta su exportacion y bira un gigante economico cu ta competi seriamente cu Rusia.
Mientras mundo mas y mas ta busca Uranium den e demanda pa reemplasa petroleo, e papel di Ukraine ta bira mas importante y e pais ta bira mas poderoso.
Esaki ta e motibo di susto di Putin dirigente di Rusia cu tambe ta un gigante poderoso economico pero mester a mira con mas y mas mundo liber ta aumenta negoshi cu Ukraine.
E guera di Ukraine tin un contenido mucho mas grandi cu e simpel desea di Rusia pa tin teritorio.
Manera semper DIARIO a trece dilanti e ta un guera economico, den cual petroleo a hunga un papel cu ta disminui mientras mundo ta dicidi pa mas y mas energia nuclear y reactornan nuclear ta aparece rond mundo.
Ta Uranium ta e motibo cu cierto partinan di Ukraine ta mas deseoso pa Rusia cu kier anexa hustamente e parti di suela mas productivo di Uranium na Ukraine.
Na Februari e guera ta continua y aliadonan di paisnan liber, ta sigui aumenta nan arsenal di guera pa Ukraine cu ta sigui registra aumento industrial tambe di Uranium pa un mundo cu ta despedi di petroleo pa drenta e Era Nuclear den cual generacion di energia lo mester aumenta drasticamente.
Paisnan mester posiciona nan mes y material di guera ta sigui yega Ukraine, caminda guera ta culmina na Februari 2023, un aña despues di e atake dirigi pa Putin.
