Cynthia Quant, Program Manager FCVR:
ORANJESTAD (AAN)— Cynthia Quant, Program Manager di Fundacion Contra Violencia Relacional (FCVR), a relata den entrevista cu DIARIO, cu door di e diferente servicionan cu FCVR ta brinda, nan a cuminza un aña hopi activo den comunidad.
E fundacion a duna diferente tayer di trabao desde Januari y Februari, yegando mitad di aña ya nan tabata tin casi e cantidad di casonan cu a ricibi den full aña pasa. Cynthia Quant a menciona cu nan iniciativa di bay den comunidad a haci un impacto, y e aña en general ta basta activo, y FCVR ta premira cu e siguiente lunanan di aña tambe lo ta asina.
E fundacion ta bishita algun scol, y highschools. Nan a duna un tayer di trabao “Promoting health relationship”, y asin’aki tambe nan ta introduci e tema di violencia pero na un forma menos exacto.
Nan ta nota reaccionnan den klas cerca muchanan mas jong, sinembargo den maneho di casonan directo e grupo mas grandi cu e fundacion tin, ta personanan entre 35 cu 55 aña.
“Pero nos ta identifica esaki, mirando otro formanan cu nos por conecta cu e generacionnan jong. Nos tabata tin contacto cu e POH’s, pasobra nan tin contacto tambe cu e hobennan ora nan bin consulta y nos mester wak con nos kier a wak con nos por traha hunto pa por haci e colaboracion, pa brinda algo di servicio”, señora Quant a indica.
El a splica cu loke nan ta haci e ora ey no ta tanto den e forma di responde di biaha pero nan ta trahando via tayernan di trabao. “Pa conecta na un manera of otro, cu e comunidad pa nan haya informacion. Asina, eventualmente, wak con nos ta yega pa nan recibi e servicio directo”, Cinthia Quant
a señala.
Señora Quant a reitera cu un di FCVR su pilarnan ta duna tayer di trabao. Nan ta bay na companianan, scolnan, pues nan ta trahando na un forma cu si comunidad no ta yega na e fundacion, esaki ta yega na nan. Nan brindando informacion y purba habri nan mente, pasobra no ta facil a admiti cu un hende ta pasando den violencia relacional.
“Nos ta purbando di ekipa tambe e poblacion en general pasobra bo ta un familiar, un colega, pues di un manera of otro con pa support, con pa reconoce e señalnan y con tambe pa brinda apoyo”, Cynthia Quant a señala.
