Rino Hermans, director CMO:
ORANJESTAD (AAN) – Rino Hermans, director di CMO (Crisis Management Office) a splica, den entrevista cu DIARIO cu CMO tin un maneho pa e ultimo 25 añanan, cu prome cu 25 di mei cada aña, Aruba tin cu prepara su mes pa e temporada di horcan cu ta bay enfrenta den e aña concerni.
Hermans a señala cu loke ta pasando ta, cu e “cosnan ta birando peor envez di ta miho” y CMO tambe a tuma nota di esey, y e situacion atmosferico ta generando e rafaganan duro, inespera, y en principio, na Aruba nos tin un tendencia na traha e cas cu “bouw-vergunning” pero una bez cu cuminza pone cosnan acerca, esaki ta bay sin vergunning y ora di haya rafaganan fuerte, e dak y obhetonan, ta bula bay.
“Bouw-vergunning ta pa nos por garantiza cu nos ta cumpli cu e bouw- verordening despues di Hazel cu Jeanet a pasa na final di añanan 50, pa nos por garantiza cu tur hogar ta keda stabil durante e rafaganan di bientonan duro.
E aña aki, ta un tiki particular atrobe, ta bay tin 14 horcan di cual 3 lo bira horcan mayor, pero nos tin Sahara cu nos ta ocupa cu ne, y aworaki nos ta bay drenta den e stacion mes. DOW ta ocupa cu su manual, cu e ta cumpli cu ne tur aña.
CMO ta monitor cu nan p’asina nos por enfrenta e periodo mas halto di e temporada di horcan 2025”, señor Rino Hermans a indica.
