Jessica van Montfoort-Posner:
ORANJESTAD (AAN) Matutino DIARIO a entrevista e Manager di Mercadeo y Comunicacion di Fundacion Cas pa Comunidad Arubiano (FCCA), Jessica van Montfoort-Posner, ken a cuminza indicando cu FCCA ta cumpliendo 45 aña di servicio pa pueblo, y cu hopi orguyo por bisa cu nan a yuda mas cu 20 mil famia caba, pa haya un cas, sea cu hipoteca of casnan di huur.
“Nos vision ta pa por sigui yuda tur hende cu tin necesidad di un cas pa haya un vivienda adecua, naturalmente dependiendo di nan situacion financiero y familiar, y tambe pa nan por haya un cas den un bario sigur y cu ta promove nan bienestar”, Jessica van Montfoort a señala.
Esaki ta hopi importante y algo cu FCCA ta enfocando riba dje. Pues pa e famia por haya un cas den un bario cu bon infrastructura, unda tin lugarnan di recreacion y unda e lugar ta mustra bunita, berde, cu semper nan a enfoca riba dje pero awo nan ta trahando hopi duro pa logra.
“Aworaki nos ta finalizando un proyecto unda nos a cuminza cu cuater bario y esaki pronto nos lo cuminza tambe cu ne, pa nos sigui tambe cu e otro barionan, pa zorg cu e ta full cla cu e infrastructura di esaki”, el a indica.
El a agrega aworaki nan tin riba presupuesto 70 cas pa aña y pronto lo keda cla cu 40 cas pa adultonan mayor na Boegoeroei. Tambe nan ta finalizando e preparacionnan pa 80 cas na Wegkustbatterij, cu lo bin den diferente fase tambe.
“Pero naturalmente, semper trahando duro pa por hisa e cantidad di proyectonan cu nos por traha riba dje” Montfoort-Posner a remarca.
El a menciona cu nan mes ta celebrando nan logronan na FCCA, pero nan kier celebra tambe hunto cu henter comunidad, y aworaki nan ta bezig cu un campaña, cu si bay riba nan website nan tin un wega di memoria. “E ta un wega interactivo cu nos tin cu comunidad, unda hendenan por gana 250 florin si nan participa den esaki y caba e wega den menos tempo posible, y asina tambe siña algo na un manera interactivo y divertido di FCCA”, Jessica Montfoort-Posner a duna di conoce.
