Maroushka Rafini, Staf Medewerker di FCCA:
*Na inicio tabata solamente pa yega na “self-bouw”
ORANJESTAD (AAN) – Maroushka Rafini, Staf Medewerker na FCCA, den entrevista cu DIARIO a resalta e historia di Fundacion Cas pa Comunidad Arubano y su importancia pa hende por a yega na un cas for di e decada di 1970.
El a conta cu FCCA a wordo funda dia 13 di Februari di aña 1979, y primordialmente tabata pa yuda tur e personanan cu tabata desea di traha un cas, of tabata tin tereno pa traha cas pero cu di un of otro manera, no por a yega facil na un of otro instancia financiero.
Entre otro, pasobra nan salario no tabata locual nan tabata pidi na banco for di otro instancianan, y tambe hopi biaha nan tabata pidi pa traha e cas te na ringbalk of un down-payment. Maroushka a splica cu e hendenan aki no tabata tin esey, y pa e motibo aki a dicidi cu mester a bin un otro alternativa.
“E ora ey, Gobierno hunto cu Hulanda a bin cu e Fundacion aki. Dus, FCCA a wordo lanta na cuminzamento, solamente pa yuda cu locual tur hende conoce den comunidad como ‘self-bouw’: yuda e hende yega na su prome cas. Mi ta pone enfasis riba ‘prome cas’ pasobra nos no tabata kier pa e bira algo comercial, y esey no tabata por tampoco pa un fundacion. Pero si yuda nan traha cas y guia nan pa traha cas. Guia tabata un di e cosnan mas esencial y importante cu nos tabata ofrece e cliente e ora ey”, Rafini a relata.
E dama a agrega cu dos of tres aña despues a tuma tur e casnan cu gobierno a traha durante tur e añanan, anto e ora ey FCCA a cuminza beheer e casnan ey.
“Pesey mes bo ta haya cu ta huur un cas hopi mas aña cu locual FCCA ta existi, pero e casnan ey cu tabata cas di gobierno nos a tuma over pa nos beheer pa gobierno”, Maroushka Rafini a reitera.
El a splica cu ora FCCA a tuma nan over, nan a tuma mas of menos 1.100 cas y no ta nan tur gobierno a traha, pasobra ta conoce cas di polis, Douane, pues tur e casnan cu a wordo traha anteriormente caba, prome cu FCCA su existencia.
“Tambe a yega un momento caminda otorgamento di casnan di huur tabata den man di gobernantenan, anto pa saca nan for di e patronahe politico eynan, a dicidi haci tur cos nechi, riba regla, y a bin cu un sistema cu tambe a wordo ‘opgenomen’ pa Hulanda, y nan a pone esey tambe como un di e exigencianan, anto FCCA a cuminza maneha e casnan ey tambe pa gobierno”, Maroushka Rafini a subraya.
