ORANJESTAD (AAN): FCCA a haci entrega di un donacion di 5.000 Florin na Cruz Cora Aruba pa victimanan di e temblornan devastador na Venezuela cu a socede na final di Juni 2026.
Tur hende a mira con e temblornan ey a afecta e pais bisiña Venezuela. For di principio FCCA a haci un colecta entre e personal di FCCA y Gerencia a completa pa e suma pa yega na un total di 5.000 Florin.
Inicialmente, FCCA tabata tin e intencion pa cumpra productonan esencial y manda via Cruz Cora pa Venezuela. Sinembargo, a base di e informacion cu a ricibi di Cruz Cora Aruba, na e momentonan aki tin mas necesidad pa apoyo financiero. Esaki ta permiti Cruz Cora pa uza e aporte mas miho, segun e necesidadnan mas urgente.
Cruz Cora Internacional a informa cu na Venezuela un promedio di 5.000 hende a perde nan bida, mas cu 16.000 persona a keda herida y miles di persona desapareci. Casi 23.000 persona ainda ta biba den refugional temporal. Cruz Cora Internacional y Cruz Cora Venezolano a identifica tres area di prioridad aworaki cu ta: cuido di salu, cuido di salud mental y awa limpi pa bebe. Actualmente e fondonan recauda lo wordo destina pa yuda cu e areanan aki.
Empleadonan Jessica Posner y Shahayra Loefstok di FCCA a haci entrega di un check di FCCA na Rosmarly Mejia, representante di Cruz Cura Aruba.
Cruz Cora Aruba lo zorg pa e donacion aki wordo transferi pa cu e ayudo na Venezuela.
Un danki ta bay na e personal di FCCA pa nan generosidad y solidaridad pa yuda e victimanan di e temblor na e momento dificil aki. Hunto, a haci un diferencia pa e famianan cu a wordo afecta na Venezuela.
